Пошук
20.06.2018 08:05   Ілья Лапато / Catholic.by

Незвычайныя памяткі ад пілігрымаў знаходзяць у скарбонках будслаўскага санктуарыя айцы бэрнардыны. Найчасцей гэта крыжыкі, ланцужкі, часам гадзіннікі і заручальныя парсцёнкі.

Кусташ з Будслава а. Віктар Бурлака OFM расказаў, куды ідуць незвычайныя ахвяраванні і адкуль пайшла такая традыцыя.

«Гэта не перапрадаецца. Гэта ахвяравана для Бога»

«Калі бачым у скарбонках такія рэчы, то дастаём і змяшчаем іх у адмысловы скарбец, — расказвае кусташ. — Гэта не здаецца ў ламбард і не перапрадаецца. Гэтыя рэчы праз саму інтэнцыю чалавека ахвяраваныя Пану Богу, нельга выкарыстоўваць іх у іншых мэтах».

Святар падкрэслівае, што нельга глядзець на іх як на паўтара ці тры грамы каштоўнага металу:

«Гэта сімвалічныя рэчы, а не нейкія надзвычайныя каштоўнасці. У іх свая гісторыя. Праз іх чалавек пакідае як бы частку свайго сэрца».

Пробашч удакладняе, што гэтыя рэчы можна было б выкарыстаць для аздаблення пазалочаных шаты і рамы абраза.

«Такая практыка існуе і ў іншых марыйных санктуарыях свету і Еўропы, — адзначае а. Віктар Бурлака OFM. — Таксама вотумамі, зробленымі ў форме рукі, нагі або сэрца, — аздабляюць алтары вакол цудатворных абразоў. Сэрца ў такіх вотумах — сімвал аздараўлення душы чалавека».

На думку пробашча, не выключана, што сённяшняя шата на абраз Маці Божай была зроблена якраз з такіх памятак.

Найбольшыя цуды адбываюцца ў сэрцы

«Найбольшыя цуды адбываюцца ў сэрцы чалавека. Іх нельга ўбачыць ці неяк вымераць, — дадае айцец Віктар. — Бываюць выпадкі, калі людзі прыходзяць і расказваюць свае гісторыі: пра аздараўленне пасля цяжкай аварыі ці нараджэнне дзяцей пасля доўгага часу бяздзетнасці».

Кусташ адзначае, што такія выпадкі не рэдкасць:

«Пасля ўсяго перажытага людзі прыходзяць да Маці Божай Будслаўскай, каб падзякаваць. Часта яны хочуць пакінуць памятку пра сваё аздараўленне: шмат разоў здаралася, што пакідалі гадзіннік, крыжык або ланцужок. Я ж заўсёды прашу, каб людзі запісвалі цуды аздараўлення».

Пісьмовыя сведчанні святар збірае і захоўвае.

«Любое ахвяраванне ў скарбонцы — знак удзячнасці чалавека перад Богам і мы з павагай ставімся да гэтых часамі нечаканых знаходак», — дадае святар.

«Тут варта згадаць прыпавесць пра ўдовін грош: жанчына кінула ў скарбонку толькі дзве лепты, але перад Богам яны мелі куды большую вартасць перад тымі, хто кідаў, маючы лішак» (пар Мк 12, 42).

* * *

Кожную нядзелю ў 12.00 у санктуарыі Маці Божай Будслаўскай цэлебруецца Імша за здароўе усіх, хто просіць аб малітве перад абразом Маці Божай — т.зв. «складковая» Імша.

Сёлета ўрачыстасці ў Будславе пройдуць 1 і 2 ліпеня і будуць прымеркаваны да 20-годдзя каранацыі папскімі каронамі абраза Маці Божай Будслаўскай.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця