9–10 сакавіка ў парафіі Узвышэння Святога Крыжа ў Брэсце прайшло малітоўнае чуванне «24 гадзіны для Пана», якое распачалося ранішняй святой Імшой у пятніцу.
Увесь дзень у касцёл прыходзілі вернікі са сваімі падзякамі і просьбамі. У чуванні бралі ўдзел розныя каталіцкія групы і супольнасці, прадстаўнікі многіх парафій Брэста і ваколіц.
Моладзь з парафіі Св. Юзафа прадставіла інсцэніроўку на тэму цяжкасцяў, праз якія праходзіць вернік, каб наблізіцца да Езуса. Маладымі людзьмі было паказана, што Бог усіх людзей адорвае любоўю і змагаецца з сіламі цемры за кожнага чалавека; дапамагае супрацьстаяць і заўсёды прабачае.
Крыжовы шлях разам з Езусам вернікі прайшлі ажно тры разы. Трэці раз быў незвычайным: шлях прайшоў у выглядзе малітоўнай пастаноўкі, якую прадставіла моладзь з парафіі Узвышэння Святога Крыжа. Мэтай пастаноўкі было паказаць, што мы патрэбны Богу такія, якія мы ёсць, без усялякіх масак.
Езус сарваў з людзей маскі нявер’я, пагарды, ілжы, страху і іншых чалавечых заганаў і прынёс іх пад крыж.
У «24 гадзінах для Пана» ўзялі ўдзел і навучэнцы Міждыяцэзіяльнай духоўнай семінарыі ў Пінску. Падчас працэсіі з дарамі ім была даручана вельмі адказная місія: прынесці ўсе клопаты, перажыванні, боязі і турботы прысутных, запісаныя на сэрцах, да Бога ў Найсвяцейшым Сакрамэнце. Семінарысты сваім прыкладам заклікалі вернікаў да малітвы і да чытання Святога Пісання.
Святую Імшу ўначы ўзначаліў біскуп Пінскі Антоні Дзям’янка. Ён адзначыў, што найвялікшай праявай любові з'яўляецца Крыж. І толькі тыя, хто сапраўды любяць Бога, павінны узяць свой крыж і ісці за Ім.
Біскуп удзяліў благаслаўленне, заўважыўшы, што ў гэты час па ініцыятыве Папы ў малітоўным чуванні яднаецца ўвесь свет.
Гэтыя «24 гадзіны...» натхнілі аддаць усе свае няўдачы, сумненні, турботы і беды Богу, адкінуць нявер’е, узяць свой Крыж і ісці разам з Ім па дарозе, якая вядзе да Вечнага Валадарства.
