19 лютага ў Слоніме адбылася таварыская гульня ў міні-футбол паміж зборнай каталіцкіх святароў Гродзеншчыны і камандай ветэранаў, трэнераў і дзеючых гульцоў ФК «Слонім-2017». Піша gs.by.
Як у Слоніме ксяндзы ў футбол гулялі
Сярод удзельнікаў матчу з боку каманды гасцей былі святары з Гродна, Каробчыцаў, Геранёнаў і іншых мясцін Гродзеншчыны.
За Слонім гулялі галоўны трэнер «Слоніма-2017» Алег Кароль, за плячыма якога вопыт гульні за шматлікія замежныя клубы і барысаўскі «БАТЭ», Аляксандр Дзегцяроў, які ў свой час гуляў у маскоўскім «Лакаматыве» і «Тарпеда», трэнер каманды Аляксандр Кадаўбік, былы галоўны трэнер каманды Аляксей Шубянок і іншыя.
У сяброўскай, але ўпартай барацьбе сустрэча завяршылася з лікам 9:8 на карысць слонімцаў.
Ад каманды гасцей сустрэчу пракаментаваў капітан каманды ксёндз Павел Салабуда (на фота — трэці справа) з гродзенскай парафіі Святога Духа:
— Як каманда мы існуем 10 гадоў. Першапачатковай мэтай быў удзел у чэмпіянаце Еўропы сярод святароў. Але акрамя чэмпіянатаў мы праводзім таварыскія гульні. Тут мы хочам паказаць, што святары — гэта таксама людзі, якія цікавяцца чымсьці, займаюцца спортам.
— На які вынік Вы разлічваеце?
— Кожны хоча перамагчы, і каб гульня склалася з добрым вынікам.
— Якія Вашы любімыя гульцы ў прафесійны футбол?
— Нічога новага не скажу наконт гульцоў: гэта Мэсі, Раналда, за гульнёй якіх цікава глядзець. Сярод беларускіх гульцоў вылучу гродзенца Паўла Савіцкага.
Ад слонімцаў гульню пракаментаваў галоўны трэнер ФК «Слонім» Алег Кароль (на фота — чацвёрты справа ў верхнім шэрагу):
— Сёння мне будзе вельмі цікава даведацца, як гуляюць людзі, якія далучаюць людзей да Бога.
— За Вашу доўгую кар’еру былі выпадкі, калі нехта з Вашых партнёраў па камандах станавіўся святаром?
— Не, такога не было, але былі выпадкі, калі гулялі вельмі веруючыя футбалісты ў тых камандах, дзе і я. Асабліва гэта тычыцца грэкаў і сербаў.
