![](/3/images/news/2017/12/7136/2017-12-12-e8msdszn.jpg)
Генеральная настаяцельніца Кангрэгацыі місіянерак любові — манаскай супольнасці, заснаванай св. Маці Тэрэзай з Калькуты — наведвае беларускі Гомель 11-12 снежня.
Сястра Марыя Прэма Перык, якая ўзначальвае Кангрэгацыю з 2009 г., упершыню прыедзе ў Беларусь. Яна наведвае 17 дамоў, размешчаных у Расіі, Беларусі і Літве. 64-гадовая немка — трэцяя генеральная настаяцельніца пасля св. Маці Тэрэзы і сястры Нірмалы Джошы з Індыі.
У Гомелі сястра Прэма прабудзе паўтара дні, распавяла Беларускай рэдакцыі Ватыканскага радыё старэйшая сястра гомельскай супольнасці Рамана Марыя Корч.
«Сястра прыязджае, каб пабыць разам з намі, каб паглядзець, што мы тут робім, і проста пазнаёміцца. Дзве з нашых законніц яшчэ ніколі не сустракаліся з генеральнай маці. Гэтыя дні разам з ёй будзем праводзіць толькі ў нашым доме, для экскурсій па горадзе не будзе магчымасці. Маці прыязджае, каб удзяліць кожнай з нас час», — адзначыла манахіня.
У гомельскім Доме міласэрнасці — адзіным у Беларусі месцы знаходжання сясцёр Маці Тэрэзы — ужо больш за 20 гадоў нясуць служэнне пяць-шэсць законніц з розных краін свету: Індыі, Польшчы, Філіпін.
Тут кормяць і лечаць бедных і беспрытульных, дапамагаюць праблемным і шматдзетным сем’ям. У апошні раз генеральная настаяцельніца ордэна, тады сястра Нірмала, прыязджала ў Гомель у 2000 годзе.
Кангрэгацыя місіянерак любові была заснавана Маці Тэрэзай у 1948 г. у індыйскай Калькуце. Мэтай стала дабрачынная дзейнасць сярод абяздоленых жыхароў Калькуты, незалежна ад іх веравызнання і нацыянальнасці.
Законніцы складаюць чатыры абяцанні: паслухмянасці, міласэрнасці, беднасці і служэння найбяднейшым з бедных. Паводле статута, напісанага Маці Тэрэзай, яны павінны жыць, падобна іх падапечным, у дасканалай беднасці.