Пошук


18.11.2017 12:38   Ілья Лапато / Catholic.by

Важная знаходка ў будслаўскім санктуарыі: тут выяўлены рэліквіі св. Кацярыны Александрыйскай — адны з самых рэдкіх у свеце.

Апісанне рэліквій, якія калісьці размяшчаліся ў адным з бакавых алтароў будслаўскай святыні, было знойдзена ў архіўнай кнізе XVIII ст., складзенай падчас адной з яго інвентарызацыяй.

На гэты факт вікарый будслаўскай парафіі кс. Міхал Бубен звярнуў увагу таму, што св. Кацярына Александрыйская лічыцца галоўнай апякункай чыгуначнікаў. Ксёндз Міхал — душпастыр чыгуначнікаў Мінска-Магілёўскай архідыяцэзіі.

«У трыдэнцкія часы пры кожным асвячаным алтары знаходзіліся тыя ці іншыя рэліквіі. Звычайна іх або ўмуроўвалі, або ставілі ў рэліквіярыі на алтар», — адзначыў вікарый.

Святар дадаў, што, пабачыўшы згадку пра рэліквіі ў кнізе, пачаў шукаць іх.

«У камуністычныя часы рэліквіі схавалі, каб зберагчы іх. Мы знайшлі іх 14 верасня — у дзень Узвышэння Святога Крыжа. Капсула з рэліквіямі святой была завернута ў мяшочак, але знаходзілася ў касцёле», — распавёў кс. Міхал Бубен.

25 лістапада адбудзецца ўрачыстае ўнясенне рэліквій у будслаўскі санктуарый. Спецыяльна для гэтага ў Будслаў прыбудзе дапаможны біскуп Мінска-Магілёўскай архідыяцэзіі Юрый Касабуцкі. Пачатак св. Імшы ў 12.00.

Гэты дзень для ўнясення рэліквій у абноўленым рэліквіярыі абраны невыпадкова. 25 лістапада — літургічны ўспамін св. Кацярыны Александрыйскай.

«Радуюся, што ўдалося адшукаць гэтыя рэліквіі, — прызнаецца кс. Міхал. — Іх вельмі складана атрымаць, таму ў некаторым родзе гэта унікальная рэч. Галоўныя рэліквіі знаходзяцца ў кляштары на Сінаі. Наколькі я ведаю, на Беларусі рэліквій св. Кацярыны больш нідзе няма. Прынамсі афіцыйна. У Польшчы яны ёсць у кляштары супольнасці сясцёр св. Кацярыны ў Бранева».

На ўрачыстасць унясення рэліквій прыбудуць таксама сёстры з супольнасці св. Кацярыны, якія нясуць служэнне ў Гродне. Да ўдзелу ў св. Імшы запрашаюцца таксама чыгуначнікі Беларусі і ўсе жадаючыя.

Падрабязней пра душпастырства чыгуначнікаў у Беларусі

Абноўлена 18.11.2017 14:55
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа