Аўтарам музыкі і слоў афіцыйнага гімна І Сінода Гродзенскай дыяцэзіі выступіў кс. Тадэвуш Крыштопік — дырэктар дыяцэзіяльнага выдавецтва і пробашч парафіі Беззаганнага Зачацця Найсвяцейшай Панны Марыі ў Квасоўцы (дэканат Гродна-Захад).
Днямі гімн быў зацверджаны біскупам Гродзенскім Аляксандрам Кашкевічам.
Гімн існуе ў дзвюх моўных версіях: па-беларуску і па-польску. Пераклад на беларускую мову здзейсніла Юлія Шэдзько.
У каментарыі для grodnensis.by генеральны сакратар дыяцэзіяльнага Сінода кс. канонік Антоні Грэмза адзначыў, што гімн быў спецыяльна напісаны да гэтай важнай падзеі i перш за ўсё змяшчае галоўны дэвіз Сінода — «Жыць Евангеллем».
«Заахвочваем спяваць гімн у нашых святынях, асабліва ў гэты час, калі будзе праходзіць Сінод. Хацелася б, каб ён пабуджаў найперш да малітвы і ўзаемнай адказнасці за нашу супольнасць дыяцэзіяльнага Касцёла», — сказаў Генеральны сакратар Сінода.
Як дадаў святар, гімн гучыць як заклік да жыцця паводле прынцыпаў Евангелля.
Першы раз гімн у Гродзенскай дыяцэзіі прагучыць 16 лістапада, ва ўрачыстасць Найсвяцейшай Панны Марыі Вастрабрамскай, Маці Міласэрнасці, у гродзенскім катэдральным касцёле св. Францішка Ксаверыя ў дзень адкрыцця I Сінода Гродзенскай дыяцэзіі.
Ва ўрачыстасці прымуць удзел запрошаныя біскупы Беларусі, святары і сёстры законныя Гродзенскай дыяцэзіі, вернікі-дыяцэзіяне.
Ноты беларускай версіі гімна можна спампаваць тут››
Жыві Евангеллем
1. Соль зямлі, святло для свету — вось найлепшы шлях жыццёвы.
Цэлы свет хай бачыць гэта і праславіць Бога ў небе.
Рэфрэн: Жыві Евангеллем ў жыцці штодзённым
і, ўзяўшы крыж, выходзь на шлях Хрыстовы.
Жыві Евангеллем, з любоўю ў сэрцы,
каб ў свет дабро, спакой і радасць несці.
2. Станьма ў лік Хрыстовых вучняў — сэрцам чыстых, міласэрных,
убогіх духам і лагодных, справядлівых і пакорных.
3. Страх адкіньма, калі людзі нас за праўду ненавідзяць.
Прабачайма ўсім варожасць, ў небе наша ўзнагарода.
