Пошук


03.11.2017 15:05   Ілья Лапато / Catholic.by

2 лістапада, ва ўспамін усіх памерлых вернікаў, у Falcon Club Буцік Кіно адбыўся паказ дакументальнага фільма «Салей, якога мы не ведалі». У гэты дзень славутаму хакеісту магло б споўніцца 43 гады.

Дакументальны фільм падрабязна апісвае жыццёвы шлях хакеіста, знаёміць гледачоў з успамінамі пра яго калег па зборнай, прадстаўляе аповеды жонкі Бэтэн і маці Таццяны Гаўрылаўны.

У пачатку фільма маці Руслана Салея прызнаецца, што, калі зацяжарыла Русланам, то хацела пазбавіцца ад дзіцяці. Руслан Салей нарадзіўся ў 1974 годзе, калі ў іх сям’і ўжо было двое дзяцей: 12-гадовы Вадзім і 10-гадовая Анжэла.

На той момант Тамары Гаўрылаўне было 34 гады, і спачатку яна не хацела нараджаць. Дарэчы, у падобнай сітуацыі была і маці футбаліста Крышціану Раналду.

— Заробак быў нізкі. Цяжарнасць была незапланаванай, — прыгадвае той час Тамара Гаўрылаўна Салей. — Калі я пра яе даведалася, то зразумела, што трэцяе дзіця мне не патрэбна. Але, відаць, Бог так захацеў: у шпіталі мяне адправілі назад — у мяне не было даведкі пра заробак. Пазней Руслан, ужо ведаючы пра гэту гісторыю, дакараў мяне: мама, ну як так? Пасля, калі ён падрос, я казала: што б мы рабілі без нашага Руслана?!

Сам Руслан Салей у архіўным інтэрв’ю 2003 года пракаментаваў гэтую сітуацыю наступнай фразай: «Мне быў дадзены шанец, які не даваўся нікому іншаму. Задача была ўзяць і выкарыстаць яго».

Упершыню фільм «Салей, якога мы не ведалі» журналісткі АТН Ганны Эйсмант быў паказаны ў эфіры 8 верасня 2012 года — да гадавіны трагедыі з яраслаўскім «Лакаматывам». У 2013 годзе фільм атрымаў прыз ад Беларускай асацыяцыі спартыўнай прэсы. У 2014 годзе стужку адзначылі прызам на Міжнародным фестывалі спартыўных фільмаў у намінацыі «Спорт і асоба».

Абноўлена 06.11.2017 14:57
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.