Стагоддзе апошняга фацімскага аб’яўлення ў Фаціме ўрачыста адзначылі 13 кастрычніка ў санктуарыі Маці Божай Фацімскай у Шуміліне. Шматлікія вернікі сабраліся разам з біскупам Віцебскім Алегам Буткевічам, каб аддаць пашану Маці Божай.
Напярэдадні, 12 кастрычніка, у марыйным санктуарыі Маці Божай Валадаркі Азёраў у Браславе завяршылася перэгрынацыя фігуры Маці Божай Фацімскай у Віцебскай дыяцэзіі, якая праз год вярнулася ў шумілінскі санктуарый.
Як адзначыў кусташ санктуарыя а. Анджэй Юхневіч ОМІ, гэтая перэгрынацыя, а таксама прысвячэнне Віцебскай дыяцэзіі Маці Божай Фацімскай, што здзейсніў біскуп Віцебскі падчас сёлетніх ўрачыстасцяў у Браславе, спрыяла больш глыбокаму разважанню над тэмай гэтага фацімскага года: «Фацімскае пасланне Марыі — шлях да навяртання».
Біскуп Алег Буткевіч прысвяціў гамілію праблеме пакаяння ў святле фацімскага паслання. Іерарх заклікаў вернікаў да навяртання і перамены свайго жыццця. Асаблівую ўвагу віцебскі ардынарый звярнуў на малітву Ружанца, заклікаючы «быць вернымі ружанцовай малітве».
Пасля Імшы вернікі разам з біскупам і святарамі прайшлі ў працэсіі, на чале якой святары і вернікі неслі фігуру Маці Божай Фацімскай, молячыся Ружанец. Далёка па наваколлі ў цемры, якую асвятлялі толькі агеньчыкі шматлікіх свечак у руках вернікаў, разносіліся словы малітвы: «Святая Марыя, Маці Божая, маліся за нас, грэшных...» Апошнюю дзясятку Ружанца маліліся дзеці шумілінскай парафіі, што прыгадвала постаці дзяцей-пастушкоў з Фацімы.
13 кастрычніка Віцебская дыяцэзія таксама адзначала 18-годдзе свайго заснавання. З гэтай нагоды шумілінскія вернікі падарылі біскупу букет белых ружаў. Іерарх усклаў кветкі да фігуры Маці Божай Фацімскай.
