26 верасня ў Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску ўрачыста распачаўся новы навучальны год.
Урачыстая інаўгурацыя пачалася, паводле традыцыі, спевам студэнцкага гімну Gaudeamus. Пасля да семінарыстаў, духавенства і гасцей свята звярнуліся біскуп Пінскі Антоні Дзям'янка і рэктар МВДС ксёндз Андрэй Рылка. Віцэ-рэктар семінарыі ксёндз Адам Дынак расказаў пра вынікі мінулага навучальнага года. Пастырскае слова да навучэнцаў скіравалі дапаможны біскуп Мінска-Магілёўскай архідыяцэзіі Юрый Касабуцкі і дапаможны біскуп Пінскай дыяцэзіі Казімір Велікаселец.
Дыпломы аб заканчэнні МВДС з рук біскупа Антонія Дзям'янкі атрымалі выпускнікі ксёндз Антоні Анціпенка і дыякан Андрэй Багдановіч.
Сёлета на першы курс МВДС залічаны 8 юнакоў з Пінскай, Віцебскай дыяцэзій і Мінска-Магілёўскай архідыяцэзіі. Для іх найбольш яскравым момантам стала ўручэнне студэнцкіх білетаў і заліковых кніжак.
Найважнейшым момантам урачыстасці стала святая Імша ў пінскай катэдры. Семінарысты маліліся разам з духавенствам Пінскай і гасцямі з іншых дыяцэзій Беларусі.
У гаміліі падчас Імшы біскуп Антоні Дзям’янка адзначыў: “Калі мы сёння можам, пачынаючы ад 1926 года, урачыста распачынаць новы навучальны год, час духоўнай і інтэлектуальнай фармацыі ў Міждыяцэзіяльнай духоўнай семінарыі ў Пінску, то гэта стала магчымым таму, што хтосьці на Палессі перад намі меў адвагу абвяшчаць Евангелле”.
Па словах іерарха, “пастырская адвага, любоў да касцёльнай супольнасці і руплівасць у выкананні даверанага кожнаму задання – гэта люстраное адбіццё асобы Добрага Пастыра, Езуса Хрыста”, і “тады не страшныя небяспекі”, “таму што адвага веры і мудры погляд на зямныя справы перамагаюць драпежных ваўкоў і ўсялякія хітрыя задумы злога”.
Пінскі ардынарый дадаў, што “духоўная семінарыя з’яўляецца домам чалавечай і інтэлектуальнай фармацыі, а тыя, хто сюды прыйшоў, павінны кіравацца праўдай, якую можам разглядаць у катэгорыях: здабыццё філасофскіх і тэалагічных ведаў, паглыбленне хрысціянскай этыкі і паглыбленне адносін з Богам”.
“Мы пераконваемся ў тым, што місія Касцёла яшчэ толькі пачынаецца, і ў яе служэнні мы павінны задзейнічаць усе сілы”, - падкрэсліў біскуп. Іерарх звярнуў увагу таксама на прынцып “вернасці Богу і чалавеку”. “Вернасць вынікае з мэты катэхезы. Гэта значыць давесці да еднасці з Хрыстом”, - патлумачыў біскуп.
“Таму важна, каб ні перад кім не зачыняць Божае Валадарства, але адважна і з верай весці дзяцей да Бога”, - дадаў іерарх, а таксама пажадаў семінарыстам “асабістага ўзрастання ў веры, добрага разумення сваёй місіі, адвагі сведчання веры і патрэбнай кваліфікацыі, каб узорна выканаць заданне”.
Акрамя таго, пінскі ардынарый пажадаў навучэнцам семінарыі, каб яны падчас фармацыі “глянулі на сябе з перспектывы, з дыстанцыі”, бо, “калі не маеш кантакту з самім сабой, то ці можаш мець кантакт, адносіны з тымі, якіх у будучыні будзеш весці”.
“Няхай Марыя, Зорка Евангелізацыі, Сталіца Мудрасці, Пані Фацімскіх аб’яўленняў, навучыць нас праўдзе аб Езусе Хрысце, нашым Пану і Збаўцу. Бо Ён сам – гэта Добрая Навіна, якую мы павінны ісці і абвяшчаць”, - сказаў біскуп.
