Каля 70 гадоў у памяшканнях святыні у Давыд-Гарадку (Столінскі раён, Брэсцкая вобласць) дзейнічаў Дом культуры. Гістарычны будынак касцёла Божага Цела вярнулі католікам. Ідзе рэгістрацыя парафіі, а вернікі ўжо распачалі рамонтныя працы ў святыні.
Касцёл быў пабудаваны на ахвяраванні парафіянаў у канцы 1930-х гадоў. На той час у горадзе налічвалася больш за 2,5 тысячы католікаў. З прыходам савецкай улады святыню закрылі, знеслі званіцу і перабудавалі пад клуб.
Дом культуры знаходзіўся тут амаль 70 гадоў, але ў 2017 годзе ў межах абласных «Дажынак» для клуба рэканструявалі будынак былога кінатэатра. Дом культуры пераехаў у новае памяшканне, а гістарычны будынак вярнулі католікам Пінскай дыяцэзіі.
На сёння каталіцкая парафія ў Давыд-Гарадку праходзіць працэс рэгістрацыі. Плануецца, што яе адміністрарам стане кс. Андрэй Шут, экзарцыст Пінскай дыяцэзіі.
Касцёл у Давыд-Гарадку будаваўся тройчы, пачынаючы з XVII стагоддзя. Першыя дзве святыні згарэлі, а трэцюю забралі савецкія ўлады.
