26 жніўня пры гродзенскім касцёле Звеставання Найсвяцейшай Панне Марыі прайшла сустрэча, арганізаваная Душпастырствам выкладчыкаў, настаўнікаў і выхавацеляў.
Амаль 40 чалавек з Гродна, Ліды, Забалаці, Воранава і іншых месцаў сабраліся разам, каб прасіць у Бога падтрымкі ў настаўніцкім служэнні і даверыць Стварыцелю сваіх вучняў.
Канферэнцыя, праца ў групах, адарацыя Найсвяцейшага Сакрамэнту, святая Імша і выступ гурта OPEN — праграма, якая чакала ўдзельнікаў сустрэчы. Эўхарыстыю ўзначаліў біскуп Гродзенскі Аляксандр Кашкевіч. Іерарх благаславіў сабраных вернікаў на настаўніцкае служэнне ў новым навучальным годзе і пажадаў поспехаў у нялёгкай справе выхавання маладога пакалення.
Духоўны кіраўнік душпастырства кс. Антоній Грэмза прамовіў гамілію, у якой адзначыў, што кожны педагог павінен быць аўтарытэтам для сваіх вучняў, але зарабіць яго можна не загадамі і паказной суровасцю, а словамі і ўчынкамі. «Настаўнікі пакліканы быць прыкладам для сваіх выхаванцаў, у тым ліку прыкладам веры. І не трэба баяцца, што вы сутыкнецеся з іншымі поглядамі і нават непрыняццем вашай пазіцыі. Проста не разлічвайце толькі на сябе, а дзяліцеся сваімі турботамі з Езусам», — падкрэсліў ксёндз Антоній.
Душпастырства выкладчыкаў, настаўнікаў і выхавацеляў Гродзенскай дыяцэзіі дзейнічае з 2001 года. Сустрэчы праходзяць раз у месяц. Да іх рыхтуюцца тэматычныя рэфераты, а пасля праходзяць дыскусіі.
