Паслядоўнікі св. Юзафа Каласанса займаюцца выхаваннем дзяцей і моладзі і маюць непасрэднае дачыненне да адукацыі. Таму было вырашана да 400-годдзя існавання ордэна піяраў і 250-годдзя з дня кананізацыі св. Юзафа Каласанса правесці першую інтэлектуальную гульню сярод моладзі са Шчучына і Ліды.
27 жніўня на тэрыторыі шчучынскай парафіі сабралася пяць каманд па шэсць чалавек, кожная са сваёй назвай і вялікім энтузіязмам да гульні: са Шчучына — «Вітольдаўны», «Парадокс», «Дзеці з-за Тыбра», каманда з Ліды «Лімонны Каласанс», а таксама мяшаная каманда Ліда-Шчучын — «Мікс». Арганізатар гульні — Аляксандр Снапко.
Віктарына складалася з 5 тураў:
- даваліся розныя цікавыя факты на рэлігійную тэму, і за адну хвіліну трэба было адказаць, праўда гэта ці не
- з прапанаваных адказаў на пытанне трэба было выбраць адзін правільны. Тут у камандах асаблівым чынам праявілі сябе міністранты, дзякуючы якім каманды лёгка справіліся з многімі пытаннямі на тэму літургіі
- кожная каманда магла выбраць пытанне з адной з прапанаваных катэгорый: Біблія, Касцёл у Беларусі, Паўсюдны Касцёл, музыка ў Касцёле, піяры, св. Юзаф Каласанс. Найбольш папулярнай была катэгорыя «музыка ў Касцёле» — па мелодыі адгадвалі песню ці гімн, а некоторыя з іх нават праспявалі разам
- у адным з самых складаных тураў не прапаноўваліся варыянты адказаў. Некаторыя пытанні патрабавалі дасканалых ведаў, а на некаторыя можна было адказаць лагічна, як напрыклад: «Якім сказам заканчваецца Новы Запавет?»
- у апошнім туры спатрэбіліся веды не толькі па гісторыі хрысціянства, але і па геаграфіі і нават матэматыцы.
Пераможцы віктарыны:
- 1 месца: «Дзеці з-за Тыбра» (34 балы) — Шчучын
- 2 месца: «Лімонны Каласанс» (27 балаў) — Ліда
- 3 месца: «Мікс» (25 балаў) — Ліда/Шчучын
- 3 месца: «Парадокс» (25 балаў) — Шчучын
- 4 месца: «Вітольдаўны» (20 балаў) — Шчучын.
