4-6 жніўня ў Баранавічах прайшлі рэкалекцыі для сем’яў «Тобій і Сара», распрацаваныя ініцыятыўнай групай на аснове біблейскай Кнігі Тобія. На працягу трох дзён сужонкі спасцігалі сэнс і прынцыпы сапраўднага хрысціянскага сямейнага жыцця, неабходнасць Божага вяршэнства ў сем’ях.
Ужо другі горд запар на рэкалекцыях працавала сям’я Алены і Валерыя Шымакоў, якія праводзілі заняткі для дзяцей і падлеткаў. У выніку сямейныя пары цалкам маглі засяродзіць сваю ўвагу на матэрыялах і практычных занятках, якія ім прапанавалі вядучыя рэкалекцый. Дзякуючы такой дапамозе дзіцячых рэкалекцыяністаў, сабралася рэкордная колькасць сем’яў – 21.
Рэкалекцыі былі яркімі і насычанымі: тут былі і невялікія тэатральныя імпрэзы, і эмацыянальныя выступы святароў і вядучых пар, і практычныя заданні для сужонкаў, і сумесныя спевы, і танцы, і аднаўленні сужэнскіх абяцанняў, малітва да Духа Святога і інш.
Завяршыліся рэкалекцыі падсумаваннем, калі ўдзельнікі дзяліліся сведчаннямі, як уздзейнічала на іх унутраны свет усё перажытае на працягу трох дзён.
Запрашаем далучацца да суполкі сем’яў Equipes Notre Dame і ўжо ў лістападзе гэтага года самастойна перажыць незабыўныя моманты рэкалекцый.
