![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-001.jpg)
Тысячамі агеньчыкаў зіхаціць сквер перад касцёлам. Сапраўдная вогненная рака! У кожнага верніка — свой зніч у руках. Аб тым, з якой сілай гарыць агонь унутры кожнага з іх, ведае толькі Бог.
Традыцыйная начная працэсія сёлета прайшла з фігурай Маці Божай Фацімскай, 100-годдзе аб’яўленняў якой адзначаецца ва ўсім свеце. Святую Імшу апоўначы ўзначаліў Апостальскі Нунцый у Беларусі арцыбіскуп Габар Пінтэр.
Вітаючы прысутных на начной Імшы, нунцый адзначыў, што прыбыў на ўрачыстасць як прадстаўнік Святога Айца, які падчас наведвання Фацімы адзначаў: «Я жадаю прыйсці да Божай Маці, ахвяруючы Ёй у дар самыя прыгожыя “кветкі”, якія Езус даверыў маёй пастырскай апецы, гэта азначае — братоў і сясцёр ва ўсім свеце, збаўленых Яго крывёю, не выключаючы нікога».
![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-002.jpg)
![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-006.jpg)
«Гледзячы на вас, якія сабраліся вакол нашай любай Маці, магу сказаць, што жаданне папы Францішка спаўняецца і ў Беларусі», — зазначыў іерарх.
Апостальскі нунцый заклікаў вернікаў перажыць ахвяру Эўхарыстыі ў духоўнай лучнасці з Пантыфікам і ўсім Касцёлам.
«У сваю чаргу я давяраю Багародзіцы кожнага з вас, просячы Яе, каб яшчэ раз шапнула на вуха кожнаму: “Маё Беззаганнае Сэрца будзе тваім прытулкам і шляхам, які прывядзе цябе да Бога”», — заключыў Пантыфік.
![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-008.jpg)
У сваёй гаміліі арцыбіскуп Габар Пінтэр заахвоціў вернікаў «прасякнуцца любоўю Айца, каб яшчэ раз адчуць моц яднання ў Хрыстовым Касцёле»:
«Мы прыйшлі ў Будслаў, каб “нашыя душы грэліся”, — зазначыў нунцый. — Тут мы сустракаем асаблівую прысутнасць міласэрнага Бога. Тут мы адчуваем сябе як дома, дзе Нябесная Маці заўсёды цярпліва і аддана чакае нашага вяртання дадому».
Марыя — не тая жанчына, якая падала духам
Заахвочваючы вернікаў даверыцца Марыі, Апостальскі нунцый дадаў, што варта глядзець на Божую Маці «як на Маці і дабравесніцу хрысціянскай надзеі».
«Марыя не тая жанчына, якая падае духам сярод трывог жыцця, асабліва калі здаецца, што ўсё не так. Яна — верная Божаму плану, верная свайму прамоўленаму слову “так”. Яе прыклад паказвае, што наш Збаўца звяртаецца да кожнага чалавека», — адзначыў нунцый.
![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-011.jpg)
![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-014.jpg)
Арцыбіскуп Габар Пінтэр нагадаў, што ў кожным святым месцы свету, куды прыходзяць пілігрымы, яны трапляюць пад плашч Божай Маці і просяць яе: «Пакажы нам Езуса!» «Сапраўды, у святынях Марыі мы асаблівым чынам услаўляем Сына, а Маці амаль цалкам “хаваецца” ў таямніцы Бога», — дадаў іерарх.
Як падкрэсліў Апостальскі нунцый, у момант прамаўлення свайго Fiat «Марыя паўстае як адна са шматлікіх маці, якія жывуць на свеце і гатовыя на ўсё, прыняўшы ў сваё ўлонне жыццё новага чалавека».
![](/3/../2/images/phocagallery/2017/07/2017-07-01-budslav-noc/thumbs/phoca_thumb_l_noch-019.jpg)
![](/3/../2/images/phocagallery/2017/07/2017-07-01-budslav-noc/2/thumbs/phoca_thumb_l_2017-07-01-night2-020.jpg)
«Бязмежны давер — адметная ўласцівасць Марыі. Яна — не тая жанчына, што падае духам сярод трывог жыцця... Яна нават не тая жанчына, якая энергічна пратэстуе, паўстае супраць цяжкасцяў, прынесеных жыццём. Наадварот, Марыя — жанчына веры, якая ўспрымае лёс такім, якім ён дадзены», — нагадаў арцыбіскуп Габар Пінтэр.
«Марыя трывае каля свайго Сына да апошняй хвіліны Яго жыцця. Цяжка ўявіць, што ў гэты момант перажывала сэрца маці. У Евангеллях мала гаворыцца пра гэта. Толькі простым дзеясловам апісваецца прысутнасць маці: Яна там “была” (Ян 19, 25). Евангелісты нічога не пішуць пра Яе боль», — адзначыў іерарх, падкрэсліўшы, што праз свой прыклад Марыя вучыць чалавека правільнаму светаўспрыманню.
![](/3/../2/images/phocagallery/2017/07/2017-07-01-budslav-noc/2/thumbs/phoca_thumb_l_2017-07-01-night2-029.jpg)
Каб ісці ўслед за Хрыстом, як сцвердзіў нунцый, патрэбна многа любові. «На маю думку, Багародзіца, як клапатлівая родная маці, перадала б менавіта гэтае пасланне, як духоўную дарожную карту, паклаўшы яе нам у заплечнікі», — адзначыў арцыбіскуп Габар.
![](/3/../2/images/phocagallery/2017/07/2017-07-01-budslav-noc/2/thumbs/phoca_thumb_l_2017-07-01-night2-026.jpg)
На завяршэнне гаміліі іерарх дадаў: «Шчыра жадаю, каб мы ўсе навучыліся любіць Бога і абвяшчаць Божую любоў іншым так, як гэта рабілі Марыя, Францішак, Ян Боско — не словамі, а ле ўчынкамі, штодзённым уласным жыццём! Маці Будслаўская, апякуйся намі».