У Гродне стартавала IX Парафіяда дзяцей і моладзі Гродзенскай дыяцэзіі, якая праходзіць пад дэвізам «Разам з Марыяй да Езуса». На сустрэчу прыехала рэкордная колькасць удзельнікаў — 557 чалавек з 40 парафій. У іх ліку і ўпершыню група дзяцей і моладзі з Мінска.
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-062.jpg)
У правядзенні Парафіяды, якая сёлета праводзіцца 19-22 чэрвеня, дапамагаюць 20 валанцёраў і 10 членаў аргкамітэту пад кіраўніцтвам кс. Артура Малафея.
Старт Парафіяды
Адкрылася Парафіяда святой Імшой, якую ў парафіі Беззаганнага Зачацця Найсвяцейшай Панны Марыі ў Гроднt-Паўднёвым узначаліў біскуп Гродзенскі Аляксандр Кашкевіч. Іерарх прывітаў удзельнікаў і падзякаваў тым, хто дапамагаў у падрыхтоўцы падзеі.
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-041.jpg)
У гаміліі a. Вітольд Пяцельчыц SchP нагадаў пра духоўныя карані Парафіяды — ля яе вытокаў стаяў а. Юзаф Ёнц SchP (Польшча). Айцец Вітольд дадаў, што ордэн Айцоў Піяраў перажывае важную падзею — 400-гадовы юбілей свайго заснавання і 250-ю гадавіну кананізацыі яго заснавальніка св. Юзафа Каласанса.
На заканчэнне Эўхарыстыі быў унесены сцяг Парафіяды, удзельнікі прачыталі спецыяльную прысягу і кс. Артур Малафей урачыста аб’явіў аб афіцыйным адкрыцці Парафіяды.
Ужо вечарам прайшлі некаторыя конкурсы — мастацкі (малюнак) і тэатральны, а таксама кваліфікацыя ў шашках. Першы дзень скончыўся вечаровай малітвай у парафіяльнай святыні.
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-030.jpg)
Парафіяда як трэніроўка цнотаў
Другі дзень Парафіяды распачаўся з Эўхарыстыі ў парафіі Найсвяцейшага Адкупіцеля ў Гродне. Гэтую святую Імшу цэлебравалі новапрэзбітэры, якія ўдзялілі кожнаму ўдзельніку прыміцыйнае благаслаўленне.
У гэты дзень адбыліся інтэлектуальныя конкурсы на веданне Бібліі і жыцця Касцёла, а таксама музычныя конкурсы. У другой палове дня ўдзельнікі мелі магчымасць суцішыць сваё сэрца падчас адарацыі Найсвяцейшага Сакрамэнту. Вечарам прайшло ўзнагароджанне пераможцаў.
21 чэрвеня святую Імшу для ўдзельнікаў Парафіяды цэлебраваў Мітрапаліт Мінска-Магілёўскі арцыбіскуп Тадэвуш Кандрусевіч. Іерарх нагадаў, што галоўным заданнем Касцёла сёння з’яўляецца новая евангелізацыя — абвяшчэнне Евангелля новымі спосабамі.
Поўны тэкст гаміліі ТУТ››
Мітрапаліт Тадэвуш Кандрусевіч прыгадаў словы папы Францішка, што «спорт — гэта ўніверсальная мова, якая збліжае народы і можа прычыніцца да сустрэчы людзей і пераадолення канфліктаў. Таму спорт трэба ўспрымаць як трэніроўку цнотаў і спосаб інтэгральнага развіцця як чалавека, так і грамадства».
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-082.jpg)
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-089.jpg)
«Трыяда Парафіяды — святыня, тэатр і стадыён — павінны спрыяць гэтаму працэсу, — зазначыў іерарх. — На духоўным стадыёне, якім з’яўляецца Касцёл, пазнавайце вечна жывое і актуальнае Божае слова, шчодра чэрпайце з крыніцы Божай ласкі, якой з’яўляюцца сакрамэнты, і духоўна ўзрастайце, каб, беручы прыклад з Марыі і наследуючы яе цноты, асабліва цноту цярплівасці, у тэатры вашага маладога жыцця быць сведкамі Евангелля, той вечнай праўды, якая вядзе да збаўлення», — заключыў арцыбіскуп.
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-064.jpg)
![](/3/../2/images/phocagallery/2017/06/2017-06-22-parafijada/thumbs/phoca_thumb_l_parafijada-080.jpg)