Напрыканцы агульнай аўдыенцыі, якая 24 красавіка прайшла на плошчы святога Пятра ў Ватыкане, Папа Францішак атрымаў альбом «Нястрачаная спадчына. Хрысціянскія святыні Беларусі».
Гэтае выданне аўтарства Станіслава Янчарскага выйшла сёлета ў сталічным выдавецтве «Альфа-кніга».
Як паведамляецца на сайце грэка-каталіцкай парафіі святога праведнага Язэпа ў Мінску Svjazep.org, кнігу уручыў Святому Айцу Апостальскі адміністратар для грэка-католікаў у Беларусі архімандрыт Сяргей Гаек як падарунак на дзень імянінаў, які Папа, чыё хроснае імя Хорхэ, або Юрый, адзначаў 23 красавіка. Архімандрыт Гаек перадаў яе Папу Францішаку як падарунак ад удзельнікаў душпастырскай праграмы «М3 — мужныя мужчыны моляцца».
Архімандрыт падзякаваў Святому Айцу за яго катэхезу пра цноту хрысціянскай надзеі. У адказ Папа сказаў: «Будзьце мужнымі сведкамі надзеі».
