18 верасня ў Афінах распачалася Сустрэча біскупаў Усходніх Каталіцкіх Касцёлаў Еўропы, у якой бяруць удзел таксама прадстаўнікі Беларускай Грэка-Каталіцкай Царквы.
Як паведамляецца на сайце грэка-каталіцкай парафіі святога і праведнага Язэпа ў Мінску svjazep.org, у сходзе, які называецца «Братэрская сінакса», ўдзельнічаюць больш за 60 іерархаў з супрацоўнікамі з 20-і краін Еўропы. Гэта прадстаўнікі Каталіцкіх Касцёлаў розных традыцый: візантыйскай, армянскай, мараніцкай, сірыйскай і малабарскай.
Беларускую Грэка-каталіцкую Царкву на сустрэчы прадстаўляюць Апостальскі адміністратар для католікаў візантыйскага абраду ў Беларусі архімандрыт Сяргей Гаек MIC і іераманах Лявонцій Тумоўскі MSU.
У праграме Сінаксы — чытанне багаслоўскіх дакладаў, іх абмеркаванне і літургічныя службы. 19 верасня, у аўторак, адбудзецца Боская Літургія ў катэдральным саборы Грэка-каталіцкага Экзархата ў Афінах, а 20 верасня, у сераду, запланавана Вячэрня ў катэдры Армянскага Ардынарыята ў сталіцы Грэцыі.
На пачатку працы Сінаксы прывітальныя словы да ўдзельнікаў скіравалі Апостальскі нунцый ў Грэцыі арцыбіскуп Ян Рамэо Паўлоўскі, Старшыня Рады канферэнцый біскупаў Еўропы арцыбіскуп Віленскі Гінтарас Грушас і Сакратар Дыкастэрыі па справах Усходніх Касцёлаў мансеньёр Мішэль Жаляк.
Працы ўдзельнікаў гэтай душпастырскай Сінаксы аб’яднаны адной тэмай — «Сям’я ў сучасным свеце. Выклікі і надзеі для Усходніх Каталіцкіх Касцёлаў».
