8 жніўня Апостальскі нунцый у Вялікабрытаніі Клаўдыё Гуджэроцці, які раней прадстаўляў Святы Пасад у Беларусі, наведаў беларускую грэка-каталіцкую царкву ў Лондане, дзе ўзяў удзел у святкаванні 95-х угодкаў з дня нараджэння айца Аляксандра Надсана.
Як нагадвае Беларуская грэка-каталіцкая газета «Царква», айцец Аляксандр Надсан (1926–2015) быў выдатным святаром і грамадска-культурным дзеячам беларускай пасляваеннай эміграцыі ў Вялікабрытаніі, перакладчыкам літургічных тэкстаў Царквы візантыйскай традыцыі на беларускую мову, скарыназнаўцам, даследчыкам гісторыі кніжнай культуры і царкоўнай гісторыі.
З нагоды 95-годдзя з дня яго нараджэння Боскую Літургію ў лонданскай царкве святога Кірылы Тураўскага і ўсіх святых заступнікаў беларускага народа ўзначальваў Уладыка Кенэт Навакіўскі, біскуп украінскай грэка-каталіцкай епархіі Святой Сям’і ў Вялікабрытаніі.
Гамілію прамовіў прадстаўнік Папы Францішка ў Вялікабрытаніі арцыбіскуп Клаўдыё Гуджэроцці. Разважаючы аб прыпавесці пра даўжніка, які сам не прабачае свайму сабрату (Мц 18, 23–35), Апостальскі нунцый адзначыў, што Евангелле заклікае нас да міласэрнасці.
«Што значыць міласэрнасьць у Беларусі сёння? — Я не магу сказаць: я не ведаю, — прызнаўся Апостальскі нунцый. — Міласэрнасць і любоў — гэта самыя асноўныя словы, калі мы хочам будаваць новую цывілізацыю».
На развітанне нунцый Гуджэроцці перадаў благаслаўленне ад імя Папы Францішка сем’ям усіх прысутных на святкаваньні і пажадаў, каб беларуская моладзь змагла вярнуцца на Бацькаўшчыну, каб адбудоўваць краіну.
Пасля Літургіі з дакладам перад прысутнымі на набажэнстве выступіла даследчыца гісторыі беларускай дыяспары ў свеце Наталля Гардзіенка.
8 жніўня таксама і ў іншых беларускіх грэка-каталіцкіх парафіях і супольнасцях у малітве ўзгадалі мітрафорнага протаіерэя Аляксандра Надсана і ягонае адданае служэнне для дабра Царквы і беларускага народа.
У Віцебску Боскую Літургію ў храме парафіі Уваскрасення Хрыстовага служыў Апостальскі візітатар для беларускіх грэка-католікаў архімандрыт Сяргей Гаек у саслужэнні кліра віцебскіх парафій.
