1 верасня беларускія грэка-католікі пачалі паводле візантыйскай традыцыі Новы царкоўны год. Звычайна першы тыдзень новага царкоўнага года — гэта ў грэка-каталіцкіх парафіях і супольнасцях у Беларусі час малітвы ў найбольш актуальных інтэнцыях.
Як паведамляе сайт парафіі святога Язэпа ў Мінску Svjazep.org, такой найбольш актуальнай — хаця нечаканай — інтэнцыяй для руплівай малітвы стаў сумны і балючы факт адмаўлення ва ўездзе ў Беларусь Мітрапаліту Мінска-Магілёўскаму арцыбіскупу Тадэвушу Кандрусевічу 31 жніўня.
З благаслаўлення Апостальскага візітатара для грэка-католікаў Беларусі архімандрыта Сяргея Гаека, які ў гэтыя дні знаходзіцца ў Рыме, у грэка-каталіцкіх парафіях і супольнасцях нашай краіны праходзяць малітвы за арцыбіскупа Тадэвуша Кандрусевіча і аб магчымасці яго хуткага вяртання да сваёй паствы на Радзіме.
Гэтая духоўная акцыя грэка-католікаў праходзіць у поўнай салідарнасці і згодзе з Заявай Канферэнцыі Каталіцкіх Біскупаў у Беларусі, якая «выказвае надзею на тое, што адмова арцыбіскупу Тадэвушу Кандрусевічу ва ўездзе ў Рэспубліку Беларусь з’яўляецца толькі прыкрым непаразуменнем, якое як найхутчэй будзе вырашана, а таксама што падобныя інцыдэнты не будуць адбывацца ў будучыні».
