Пошук


30.07.2019 10:37   Тэкст: а. Аляксандр Шыбека / Catholic.by

З 15 па 21 ліпеня ў Полацку пры грэка-каталіцкай парафіі святамучаніка Язафата адбыўся 10-ы юбілейны летнік «Канікулы з Богам» для людзей з абмежаваннямі псіха-фізічнага развіцця. Арганізатарамі летніку былі валанцёры Хрысціянскага валанцёрскага руху св. Мікалая.

У гэтым годзе летнік быў унікальны. І не толькі з прычыны юбілейнага характару, але і таму, што яго наведалі цікавыя госці — прадстаўнікі супольнасці L’Arche з Варшавы.

Міжнародны рух L’Arche («Каўчэг»), заснаваны Жанам Ванье, дзейнічае ў 38 краінах свету і налічвае 154 супольнасці. Як і рух «Вера і святло», рух L’Arche ахоплівае разнастайнай апекай людзей з абмежаваннямі псіха-фізічнага развіцця, а што немалаважна, таксама іх бацькоў і сем’і.

Бо, на самой справе, менавіта бацькі дзяцей з абмежаваннямі псіха-фізічнага развіцця патрабуюць большай падтрымкі, чым самі дзеці.

Летнік атрымаўся насычаным і разнастайным. Кожны дзень у грэка-каталіцкай царкве св. Параскевы Полацкай служылася Боская Літургія. Пры парафіяльным будынку адбываліся гульні і забавы, вогнішча з гітарай і, звычайна, лазня. На самой справе, нават не важна, якой будзе праграма — галоўнае рабіць гэта разам, як адна супольнасць, як адна хрысціянская сям’я.

На развітанне сябры з L’Arche запрасілі валанцёраў руху св. Мікалая да сябе ў госці ў Польшчу, каб паслужыць там у супольнасці, набрацца практычнага досведу.

Валанцёры руху св. Мікалая запрашаюць усіх, каго цікавіць тэма падтрымкі людзей з асаблівасцямі псіха-фізічнага развіцця, маліцца ў намеры з’яўлення на Беларусі рухаў «Вера і святло» і L’Arche («Каўчэг»).

Акрамя гэтага, усе зацікаўленыя, а перадусім бацькі і сем’і людзей з абмежаваннямі псіха-фізічнага развіцця, запрашаюцца аб’яднаць высілкі, каб міласцю Божай разам дасягнуць гэтай мэты.

Калі Вы зацікавіліся, напішыце, калі ласка, на электронны адрас: shybeka@gmail.com.

Тэлефоны: +375 29 299 72 41 (МТС), +375 29 962 20 19 (Velcom), +375 33 612 64 18 (Viber).

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.