Пошук


22.08.2016 14:27  

21 жніўня грэка-каталіцкія дыяканы Зміцер Быстроў з Івацэвічаў і Аляксей Варанко з Віцебска атрымалі прэзбітэрскае пасвячэнне з рук Уладыкі Ніла (Лушчака), дапаможнага біскупа Мукачаўскай грэка-каталіцкай епархіі (Украіна).

У Полацку ў грэка-каталіцкім храме Вялебнай Параскевы Полацкай 21 жніўня святары і вернікі Беларускай Грэка-Каталіцкай Царквы прымалі высокага госця — дапаможнага епіскапа Мукачаўскай грэка-каталіцкай епархіі Ніла Лушчака.

Уладыка ўдзельнічаў у набажэнстве, якое ўпісвалася ў душпастырскую праграму «Веру ў адзіную Царкву» і на якім вернікі дзякавалі Богу за місійны подзвіг святых апосталаў славянаў Кірыла і Мятода і ўзгадвалі «евангелізацыйны» подзвіг палачаніна Францішка Скарыны.

На святочную Літургію прыехалі таксама вернікі з Івацэвіч, Брэста, Мінска і Віцебска.

Пры ўваходзе ў царкву разам з настаяцелем прыхода а. Аляксандрам Шаўцовым, дзецьмі парафіян і святарамі закарпацкага іерарха вітаў Апостальскі візітатар для грэка-католікаў Беларусі архімандрыт Сяргей Гаек.

«На працягу стагоддзяў і Кірыл, і Мятод, і Францішак Скарына, і шматлікія беларускія святары добра разумелі, што для духоўнага і культурнага развіцця чалавеку неабходна Божае слова на роднай мове», — сказаў на прывітанне Уладыкі Ніла архімандрыт Сяргей Гаек і папрасіў іерарха ўдзяліць прэзбітэрскае пасвячэнне двум беларускім дыяканам, якія будуць абвяшчаць Божае слова сваім братам і сёстрам. «Такім чынам, іх заданнем будзе працягваць місію святых Кірыла і Мятода», — дадаў Апостальскі візітатар.

У гаміліі епіскап гаварыў аб сутнасці святарства. Звяртаючыся да новапрэзбітэраў, іерарх пажадаў ім заўсёды імкнуцца быць падобнымі да трох постацяў: арханёла Гаўрыіла, што абвяшчае Марыі волю Бога, арханёла Рафаіла, які лечыць раны, і арханёла Міхаіла — ваяра, што абараняе каштоўнасці веры.

Епіскап Ніл прыехаў у Полацк з Браслава з урачыстасцяў у гонар абраза Маці Божай Валадаркі азёраў. «Некалі гэты абраз належаў нам, грэка-католікам, цяпер жа ён знаходзіцца ў рыма-каталіцкай святыні, але покрывам Маці Божай нязменна ахінуты вернікі Беларусі, прыналежныя да розных канфесій», — падкрэсліў іерарх.

Наступнай святыняй, якую наведае епіскап-пілігрым, стане Нацыянальны санктуарый Маці Божай у Будславе. Па дарозе ў Мінск епіскап заедзе таксама ў Хатынь, каб памаліцца пры магілах спаленых нацыстамі ахвяр Другой сусветнай вайны.

Паводле svjazep.org

Фота Кацярыны Вінакуравай

Абноўлена 05.06.2017 13:41
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа