У сувязі з прызначэннем 14 верасня Папам Львом XIV новым Апостальскім адміністратарам для вернікаў візантыйскага абраду ў Беларусі айца-студыта Лявонція Тумоўскага Старшыня ККББ арцыбіскуп Юзаф Станеўскі, Мітрапаліт Мінска-Магілёўскі, кіруе ў яго адрас словы віншаванняў.
Вялебнаму айцу Лявонцію Тумоўскаму
Апостальскаму адміністратару для грэка-католікаў у Беларусі
Высокадастойны айцец Лявонцій!
Ад імя Канферэнцыі Каталіцкіх Біскупаў Беларусі і ад сябе асабіста сардэчна віншую Вас з прызначэннем на адказнае служэнне Апостальскага адміністратара для грэка-католікаў нашай краіны.
Рашэнне Святога Айца Папы Льва XIV даверыць Вам кіраўніцтва Беларускай Грэка-каталіцкай Царквой з’яўляецца знакам вялікага даверу да Вашага пастырскага вопыту, манаскага сведчання і вернасці Царкве Хрыстовай.
Гады Вашага служэння ў Студыйскім устаўным манастве ўмацавалі ў Вашым сэрцы дух малітвы, мудрасці і пакоры — якасці, якія стануць трывалым фундаментам у Вашым новым, высокім архіпастырскім пакліканні.
Каталіцкі Касцёл у Беларусі прытрымліваецца прынцыпу адзінства ў разнастайнасці традыцый. Мы шчыра рады, што нашы браты і сёстры візантыйскага абраду набываюць у Вашай асобе руплівага пастыра. Перакананы, што Вашая дзейнасць на гэтай адказнай пасадзе паслужыць далейшаму ўмацаванню веры, духоўнаму адраджэнню, а таксама паглыбленню братэрскага супрацоўніцтва паміж католікамі лацінскага і візантыйскага абрадаў на нашай зямлі.
Малітоўна жадаю Вам багатых дароў Духа Святога, душэўнага і фізічнага здароўя, патрэбных сіл і заступніцтва Прасвятой Багародзіцы ва ўсіх Вашых намаганнях ва ўслаўленне Бога і на карысць вернікаў.
З братэрскай любоўю ў Хрысце,
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў Беларусі
