У нядзелю 1 чэрвеня вуліцы старажытнага Пінска сталі сведкамі прыгожай урачыстасці. Як гэта стала традыцыяй у горадзе над Пінай, на пачатку лета вернікі каталіцкіх парафій арганізуюць працэсію з Найсвяцейшым Сакрамэнтам з катэдры Унебаўзяцця Найсвяцейшай Панны Марыі ў касцёл святога Бэнэдыкта.
Сёлета эўхарыстычныя набажэнствы ў сталіцы Палесся ўзначаліў дапаможны біскуп Пінскай дыяцэзіі Андрэй Зноска. Адметным стаў таксама набожны ўдзел у працэсіі жанчын, згуртаваных у руху «Маці ў малітве», якія ў гэтыя дні сабраліся ў будынку былой Пінскай семінарыі на свой штогадовы з’езд.
Урачыстасць распачалася святой Імшой у катэдральнай базыліцы, падчас якой біскуп Андрэй маліўся за ўсю Пінскую дыяцэзію, просячы Бога аб умацаванні эўхарыстычнай пабожнасці і развіцці шчырага культу і глыбокай любові да Найсвяцейшага Сакрамэнту ў вернікаў і духавенства.
У прамоўленай гаміліі іерарх засяродзіўся на пагрозе прывыкання да наяўнасці ў касцёлах табернакулюмаў з Найсвяцейшым Сакрамэнтам, абясцэньваннем гэтага вялікага дару, якім з'яўляецца Эўхарыстыя, і заахвоціў прысутных частай асабістай адарацыяй распальваць у сабе любоў да Езуса Эўхарыстычнага.
Напрыканцы Імшы вернікі павіншавалі біскупа Андрэя з 20-й гадавінай святарскага пасвячэння.
Эўхарыстычная працэсія праходзіла вуліцамі Пінска з малітоўнымі прыпынкамі каля чатырох алтароў. Першы алтар асаблівы, бо ён традыцыйна размяшчаецца на плошчы Леніна, дакладна ў тым месцы, дзе знаходзіўся алтар разбуранага ў часы атэізму велічнага езуіцкага касцёла. Працэсія была выдатна арганізавана ў супрацоўніцтве з дзяржаўнымі ўладамі горада, дзякуючы чаму і вернікі маглі без перашкод ісці ў рэлігійным шэсці, і дарожны рух транспарту не патрабаваў істотных зменаў.
Эўхарыстычныя набажэнствы завяршыліся пры новапабудаваным касцёле святога Бэнэдыкта спевам гімну «Te Deum» («Цябе, Бога, праслаўляем») і ўрачыстым благаслаўленнем.
Біскуп Андрэй падзякаваў усім арганізатарам і ўдзельнікам свята, асабліва адзначыўшы руплівасць і падрыхтоўку міністрантаў і дзяўчынак, якія пасыпалі шлях перад Найсвяцейшым Сакрамэнтам пялёсткамі кветак, а таксама духавы аркестр Баранавіцкага музычнага каледжа, які ўпрыгожваў літургію і дадаваў бадзёрасці руху працэсіі.
