7 снежня валанцёры Дабрачыннага каталіцкага таварыства Caritas Мінска-Магілёўскай архідыяцэзіі разам з яго дырэктарам братам Анатолем Ярошкам OFMCap наведалі школу-інтэрнат у Бялынічах на Магілёўшчыне.
Як паведамляецца на старонцы Caritas Мінск у сацыяльнай сетцы Вк, мэта такіх сустрэч з дзецьмі ў школах-інтэрнатах — пашырыць іх кругагляд, даць новы вопыт і паказаць ім новыя магчымасці самарэалізацыі.
Валанцёра Caritas стараюцца дапамагчы ім развіваць навыкі, неабходныя для паспяховай сацыялізацыі ў грамадстве.
Экскурсіі, інтэрактыўныя заняткі, навучальныя майстар-класы, узаемадзеянне з камандай валанцёраў у нефармальнай абстаноўцы — усё гэта таксама спрыяе развіццю камунікацыйных навыкаў і ўпэўненасці ў сабе.
Як прызнаюцца валанцёры, для іх галоўнае дарыць дзецям самае каштоўнае — свой час, увагу і падтрымку, дапамагаючы ім адчуць сябе патрэбнымі і любімымі.
«Гэта не проста падарункі і цацкі, а ўнёсак у паспяховую будучыню кожнага дзіцяці», — адзначаюць прадстаўнікі Caritas, шчыра дзякуючы валанцёрам за сардэчнасць і радасць гэтых сустрэч, а таксама плануючы новыя мерапрыемствы для дзяцей.
