2 лістапада ў парафіі Унебаўзяцця Найсвяцейшай Панны Марыі ў Будславе (Мінска-Магілёўская архідыяцэзія, Мядзельскі дэканат) сваю першую акцыю правяла парафіяльная суполка дабрачыннага каталіцкага таварыства Caritas.
Мясцовыя валанцёры, атрымаўшы благаслаўленне пробашча будслаўскай парафіі ксяндза Дзмітрыя Дубовіка, наведалі пажылых людзей і шматдзетныя сем’і. Яны перадалі ім прадуктовыя наборы, але галоўнае — падзяліліся любоўю і цеплынёю сваіх сэрцаў.
Парафіяльная суполка Caritas у Будславе плануе зрабіць гэта добрай традыцыяй, рэгулярна ладзячы падобныя акцыі.
Валанцёры запрашаюць усіх неабыякавых парафіянаў далучыцца да дабрачыннай дзейнасці, каб разам пісаць новую старонку ў жыцці парафіі.
Кожны ахвотны можа стаць актыўным ўдзельнікам, далучыўшыся да супольнай справы, а таксама прапанаваць свае ідэі і ініцыятывы, якія дапамогуць яшчэ больш аб’яднаць парафіяльную супольнасць, сабраную вакол цудадзейнага абраза Маці Божай Будслаўскай у Нацыянальным санктуарыі.
