18 верасня, у Дзень памяці загінулых матацыклістаў, за іх цэлебравалася святая Імша ў касцёле святых апосталаў Пятра і Паўла ў Іўі (Гродзенская дыяцэзія).
Як адзначаецца на старонцы Дэканат Іўе ў сацыяльнай сетцы Вк, у цэлебрацыі ўзялі ўдзел аматары двухколавых транспартных сродкаў. Байкеры Іўя і наваколля, сярод якіх былі свецкія і духоўныя асобы, прасілі ў малітве вечнага жыцця для загінулых матацыклістаў, а таксама шчаслівых і бяспечных падарожжаў для ўсіх кіроўцаў.
Пасля Імшы яны наведалі гарадскія могілкі, дзе памаліліся за сваіх загінулых братоў.
Падзея, якая стала нагодаю для з’яўлення памятнай даты і адзначэння 18 верасня Дня памяці загінулых матацыклістаў, адбылася ў 2008 годзе. Тады ў Сімферопалі здарылася трагедыя: 16 верасня ў жудаснай аварыі загінула маладая жанчына: кіроўцы аўтамабіля на хуткасці 170 кіламетраў на гадзіну пратараніў матацыкл, на якім яна ехала.
Удар быў настолькі моцным, што двухколавы транспартны сродак выбухнуў. Матацыклам кіравала 25-гадовая Ганна Мішуткіна.
Ганну пахавалі 18 верасня. Гэты дзень абвясцілі памятным у гонар усіх загінулых матацыклістаў.
