14 верасня, у свята Узвышэння Святога Крыжа, у Мінскім тэалагічным каледжы імя святога Яна Хрысціцеля адбылася цырымонія інаўгурацыі новага навучальнага года.
Распачалася яна ўрачыстай святой Імшы ў касцёле Святога Духа ў Мінску. Цэлебрацыю святой Імшы ўзначаліў Мітрапаліт Мінска-Магілёўскі арцыбіскуп Юзаф Станеўскі. Напачатку іерарх прывітаў святароў, навучэнцаў і выкладчыкаў. Таксама са словамі прывітання да прысутных звярнуўся дырэктар каледжа і пробашч сталічнай парафіі Святога Духа ксёндз канонік доктар Ян Крэміс.
У прамоўленай гаміліі арцыбіскуп Станеўскі скіраваў увагу на моц Крыжа Езуса Хрыста, які стаў прыладаю паяднання Бога і чалавека.
«У гэты дзень інаўгурацыі новага навучальнага года з вялікай пашанай станем пад крыж Езуса Хрыста, які з’яўляецца прыладай Божай ласкі і крыніцай духоўнага ўмацавання, а гэта ў працэсе навучання і ўмацавання вельмі будзе патрэбна. <…> І ў сваім жыцці, дзякуючы Хрыстоваму крыжу, будзем старацца быць сведкамі веры, прабачэння, любові і супакою», — заахвоціў прысутных арцыпастыр.
Напрыканцы цэлебрацыі студэнты каледжа павіншавалі арцыбіскупа Станеўскага з нагоды трэцяй гадавіны прызначэння яго Мітрапалітам Мінска-Магілёўскім.
Пасля Імшы адбылася афіцыйная частка інаўгурацыі. Напачатку дырэктар каледжа прадставіў справаздачу за мінулыя гады і пазнаёміў з планамі на новы навучальны год. Таксама быў прадстаўлены новы выкладчык фундаментальнай тэалогіі, якім стаў брат Андрэй Багдановіч OFMCap. Брат Андрэй выступіў з дакладам на тэму «Devotio moderna», у якім пазнаёміў з сучаснай пабожнасцю.
Навучэнцы, залічаныя сёлета на першы курс, з рук арцыбіскупа Юзафа Станеўскага атрымалі залікоўкі і кнігу ягонага аўтарства «Як стаць сведкам Хрыста» у падарунак. На завяршэнне афіцыйнай часткі навучэнцы трэцяга курса прывіталі першакурснікаў у сям’і каледжа.
Завяршылася цырымонія інаўгурацыі супольным пачастункам, пасля чаго прайшлі першыя заняткі новага навучальнага года.
