У Міждыяцэзіяльнай вышэйшай духоўнай семінарыі ў Гродне прайшоў уступны экзамен, па выніках якога стала вядома, хто сёлета залічаны на першы курс навучання.
Як паведаміла Прэс-служба Гродзенскай дыяцэзіі, абітурыенты, сабраліся ў будынку семінарыі 8 жніўня. У гэты дзень адбываліся падача дакументаў і кваліфікацыйныя размовы са святарамі.
9 жніўня адбыўся ўступны экзамен, які складаўся з дзвюх частак: тэсту і сачынення-эсэ.
У першай частцы абітурыенты павінны былі паказаць свае веды па Катэхізісе Каталіцкага Касцёла і знаёмства з жыццём паўсюднага і мясцовага Касцёла, у другой — паразважаць на духоўныя тэмы адносна паклікання, ролі Бібліі ў жыцці хрысціяніна і таго, як дасягнуць святасці і ісці за Хрыстом у сучасным свеце.
Экзамен прымала камісія ў наступным складзе:
- біскуп Уладзімір Гуляй, каад’ютар Гродзенскай дыяцэзіі — старшыня экзаменацыйнай камісіі;
- ксёндз канонік Віталь Вайцяхоўскі, рэктар Міждыяцэзіяльнай вышэйшай духоўнай семінарыі;
- ксёндз Ян Раманоўскі, прэфект Міждыяцэзіяльнай вышэйшай духоўнай семінарыі;
- ксёндз Павел Скуба, куратар прапедэўтычнага перыяду ў Міждыяцэзіяльнай вышэйшай духоўнай семінарыі.
Пасля нарады экзаменацыйная камісія паведаміла, што новымі студэнтамі семінарыі сталі:
- Раман Буднік (Гродзенская дыяцэзія, парафія святых апосталаў Пятра і Паўла ў Іўі);
- Дамінік Буйніцкі (Гродзенская дыяцэзія, парафія святога Яна Хрысціцеля ў Гальшанах);
- Яраслаў Булко (Гродзенская дыяцэзія, парафія святых апосталаў Пятра і Паўла ў Іўі);
- Ягор Касенка (Гродзенская дыяцэзія, парафія Святой Сям’і ў Лідзе);
- Ягор Лапушэк (Гродзенская дыяцэзія, парафія Адшукання Святога Крыжа ў Гродне);
- Яраслаў Паўловіч (Гродзенская дыяцэзія, парафія Узвышэння Святога Крыжа ў Лідзе);
- Максімільян Пік (Гродзенская дыяцэзія, парафія святога Францішка Ксаверыя ў Гродне);
- Андрэй Стасюкевіч (Гродзенская дыяцэзія, парафія святога Станіслава Косткі ў Ваўкавыску);
- Мікіта Страчынскі (Гродзенская дыяцэзія, парафія Узвышэння Святога Крыжа ў Лідзе);
- Аляксей Янчык (Пінская дыяцэзія, парафія Маці Божай Фацімскай у Баранавічах).
Такім чынам, у новым навучальным годзе падрыхтоўку да святарства ў семінарыі распачнуць дзесяцера першакурснікаў.
Навучальны год у семінарыі сёлета распачнецца 2 верасня.
Адказныя за фармацыю будучых святароў у нашай краіне просяць усіх людзей добрай волі аб малітве ў інтэнцыі новых семінарыстаў, а таксама аб новых і святых пакліканнях да святарства.
