Перад агульнабеларускім фэстам Маці Божай Будслаўскай, які сёлета праходзіць 5 і 6 ліпеня, у Нацыянальным санктуарыі заўсёды вельмі шмат падрыхтоўчай працы.
Дапамагчы пробашчу парафіі ў Будславе ксяндзу Дзмітрыю Дубовіку перад святам прыехала група маладых валанцёраў з Мінска ў складзе дзесяці асобаў на чале з адказным за душпастырства моладзі ў Мінска-Магілёўскай архідыяцэзіі ксяндзом Андрэем Бураком.
Некалькі дзён юнакі і дзяўчаты з мінскай катэдральнай парафіі Найсвяцейшага Імя Марыі разам з кандыдатам да пасвячэння Аляксандрам Шыманскім, які цяпер праходзіць у архікатэдры душпастырскую практыку, выконвалі розную неабходную працу.
«Дзяўчаты чысцілі, прыбіралі, мылі, дапамагалі на кухні; хлоцы ўдзельнічалі ў зборцы канструкцыі палявого алтара, устанаўлівалі намёты для споведзі, насілі лаўкі і крэслы, усе разам складалі камуніканты ў цыборыі і дапамагалі фларыстам. У вольны час гулялі ў валейбол, хадзілі на рэчку, супольна маліліся ў гэтым асаблівым месцы, якое Марыя выбрала сваім домам», — падзялілася з Catholic.by маладая каталіцкая актывістка з Мінска Ірэна Ахрамовіч.
Акрамя моладзі, у падрыхтоўцы да фэсту ўзялі ўдзел і першыя пілігрымы. Ксёндз Павел Рудзьман, брат Валерый Кунгер, капуцын, і сястра Эльжбета Васькова, эльжбетанка, спецыяльна выйшлі ў дарогу раней, каб пасля дзевяцідзённай пешай пілігрымкі з Баранавічаў актыўна ўключыцца ў падрыхтоўку да фэсту. Да іх далучыўся яшчэ адзін святар, ксёндз Юрый Медушэўскі, які прыехаў у Нацыянальны санктуарый на ровары з Брэста.
Нязменна перад святам у Будславе рупліва працуе сястра Вольга Данькоўская, назарэтанка, якая раней доўгі час несла тут служэнне. Законніца рыхтуе ўсе неабходныя для ўрачыстых цэлебрацый рэчы, пачынаючы ад літургічнага начыння і сканчваючы абрусамі, святарскімі шатамі і свечкамі.
Будслаўскі пробашч ксёндз Дзмітрый Дубовік шчыра ўдзячны за гэтую дапамогу дзеля большай хвалы Бога і Яго Найсвяцейшай Маці.
