Апоўдні 5 ліпеня ў Нацыянальны санктуарый Маці Божай Будслаўскай на агульнабеларускі фэст прыбылі першыя пілігрымкі: на роварах з Мінска і пешая з Ліды.
Роварная пілігрымка стартавала 3 ліпеня ад мінскага касцёла Найсвяцейшай Тройцы (святога Роха) на Залатой Горцы. Прыехаўшы ў Будслаў і пакінуўшы сваіх жалезных коней перад уваходам у касцёл, стомленыя але шчаслівыя, ўдзельнікі велапілігрымы першымі прывіталі Марыю ў цудадзейным Будслаўскім абразе.
Неўзабаве пасля іх прыезду ўдалёк даляцелі гукі спеваў на хвалу Маці Божай. Гэта падыходзіла да Нацыянальнага санктуарыя пешая пілігрымка з Ліды.
З лідскімі пілігрымамі ў Будслаў прыйшоў і наймалодшы беларускі іерарх: каад’ютар Гродзенскай дыяцэзіі біскуп Уладзімір Гуляй.
Перад уваходам у базыліку пілігрымаў сустрэў і прывітаў пробашч парафіі ў Будславе ксёндз Дзмітрый Дубовік.
Усе, хто прыбывае ў Нацыянальны санктуарый, сёлета праходзяць беспрэцэдэнтны асабісты дагляд на пунктах пропуску.
