4 ліпеня біскуп Гродзенскі Аляксандр Кашкевіч здзейсніў шэраг прызначэнні сярод святароў, якія служаць у Гродзенскай дыяцэзіі.
Як паведаміла Прэс-служба Гродзенскай дыяцэзіі, ксёндз канонік Ян Пузына пасля 25-і гадоў служэння вызвалены ад абавязкаў пробашча парафіі святога Міхала Арханёла ў Ашмянах і дэкана Ашмянскага дэканату і прызначаны пробашчам парафіі Адшукання Святога Крыжа ў Гродне (пабэрнардынскі касцёл, дэканат Гродна-Захад).
На гэтай пасадзе ксёндз Ян зменіць ксяндза прэлата Антонія Ханьку, які быў пробашчам парафіі Адшукання Святога Крыжа з 1992 года і сыходзіць на пенсію па ўзросце.
Ксёндз Ян Варанецкі вызвалены ад абавязкаў вікарыя катэдральнай парафіі святога Францішка Ксавэрыя ў Гродне (дэканат Гродна-Усход) i прызначаны пробашчам парафіі святога Міхала Арханёла ў Ашмянах.
Біскуп Аляксандр Кашкевіч падзякаваў святарам за служэнне і ўдзяліў благаслаўленне на выкананне новых адказных душпастырскіх абавязкаў.
Ксёндз канонік Ян Пузына нарадзіўся 20 жніўня 1972 г. Паходзіць з гродзенскай парафіі Маці Божай Анёльскай (францішканскі касцёл). Прэзбітэрскае пасвячэнне ўдзяліў яму 24 жніўня 1996 г. у Гродне біскуп Аляксандр Кашкевіч.
Ксёндз прэлат Антоні Ханька нарадзіўся 13 чэрвеня 1949 г. Паходзіць з парафіі Унебаўзяцця Найсвяцейшай Панны Марыі ў Жалудку (Шчучынскі дэканат). Прэзбітэрскае пасвячэнне прыняў 28 мая 1978 г. у Рызе (Латвія). Шмат гадоў быў канцлерам Гродзенскай курыі.
Ксёндз Ян Варанецкі нарадзіўся 15 ліпеня 1991 г. Паходзіць з парафіі Адведзінаў Найсвяцейшай Панны Марыі ў Мікелеўшчыне (Мастоўскі дэканат). Прэзбітэрскае пасвячэнне ўдзяліў яму 4 чэрвеня 2016 г. у Гродне біскуп Аляксандр Кашкевіч.
