4 ліпеня, у другой палове дня, у Нацыянальны санктуарый Маці Божай Будслаўскай прыбыў першы пілігрым-іерарх — біскуп Казімір Велікаселец.
Ён прыехаў у Будслаў напярэдадні сёлетняга фэсту, што пройдзе тут 5 і 6 ліпеня і падчас якога адбудзецца прысвячэнне Касцёла на Беларусі Найсвяцейшаму Сэрцу Езуса.
79-гадовы іерарх — найстарэйшы ў беларускім каталіцкім епіскапаце — сам праехаў за рулём больш за 400 кіламетраў з Гомеля, дзе ў сваім паважным узросце здзяйсняе пастырскае служэнне і вядзе будаўніцтва касцёла.
Біскуп Казімір Велікаселец, дамініканін, вядомы як чалавек малітвы. У Будславе ён правёў шмат часу ў касцёле, молячыся ў цішыні перад цудадзейным абразом Маці Божай Будслаўскай.
Следам за ім у Будслаў прыбыў намеснік Старшыні Канферэнцыі Каталіцкіх Біскупаў у Беларусі біскуп Віцебскі Алег Буткевіч — наймалодшы сярод ардынарыяў мясцовага Касцёла.
Ён таксама паспяшаўся ў базыліку, каб прывітаць Маці Божую, якая ў сваім доме заўсёды чакае сваіх дзяцей, каб тут яднаць іх са сваім Боскім Сынам і выпрошваць у Яго шчодрыя ласкі.
Плануецца, што ў сёлетнім фэсце ў Будславе возьмуць удзел усе беларускія іерархі, а таксама Апостальскі нунцый Антэ Ёзіч, які сёлета завяршае сваё амаль чатырохгадовае служэнне ў нашай краіне.
