Увечары 24 мая Апостальскі нунцый у Беларусі арцыбіскуп Антэ Ёзіч наведаў катэдральную базыліку святога Францішка Ксавэрыя ў Гродне.
У гэтай святыні 25 мая ён удзеліць біскупскае пасвячэнне Уладзіміру Гуляю, прызначанаму Папам Францішкам біскупам каад’ютарам Гродзенскай дыяцэзіі. Яно стане для нунцыя Ёзіча першым біскупскім пасвячэннем у яго пастырскім служэнні.
Прадстаўнік Святога Айца ў нашай краіне прыбыў у Гродна напярэдадні. У горадзе над Нёманам Апостальскага нунцыя разам з сакаратаром Апостальскай нунцыятуры ў Беларусі монсіньёрам Кшыштафам Сэрокам шчыра віталі біскуп Гродзенскі Аляксандр Кашкевіч, біскуп намінат Гуляй, а таксама Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі.
Разам з Упаўнаважаным па справах рэлігій і нацыянальнасцяў Аляксандрам Румакам госці наведалі катэдральную базыліку святога Францішка Касвэрыя.
З гісторыяй адной з найпрыгажэйшых святыняў Беларусі іх пазнаёміў пробашч гродзенскай катэдральнай парафіі ксёндз канонік Ян Кучынскі. Прысутныя былі ўражаныя велічнай базылікай і захопленыя прыгажосцю архітэктуры і ўнікальных твораў сакральнага мастацтва, якія ў ёй знаходзяцца.
Яны таксама памаліліся перад цудадзейным абразом Маці Божай Кангрэгацкай, або Студэнцкай, які ўжо больш за тры стагоддзі ўшаноўваюць гродзенскія вернікі.
