9 мая удзельнікі аўтобуснай пілігрымкі з Мінска на чале з ксяндзом канонікам Юрыем Санько памаліліся разам з беларусамі-католікамі ў Кракаве (Польша).
Пілігрымы з парафіі Найсвяцейшай Тройцы (святога Роха) на Залатой Горцы ў Мінску на аўтобусе кіруюцца ў Будапешт (Венгрыя), да шматлікіх святынь у краіне святога Стэфана і святой Альжбеты Венгерскай. Пілігрымка арганізавана пра падтрымцы пасольства Венгрыі ў Беларусі, што з’яўляецца выразам добрых прыязных адносін паміж нашымі краінамі.
Паломніцкі шлях залатагорскіх вернікаў праходзіў праз Кракаў, дзе іх гасцінна сустрэлі мясцовыя беларусы разам са сваім душпастырам ксяндзом Юрыем Рашатко.
У парафіі святога Стэфана абедзве супольнасці разам узялі ўдзел у святой Імшы. Пасля супольнай малітвы ксёндз Юрый Рашатко распавёў гасцям пра дзейнасць беларускага душпастырства ў Кракаве і благаславіў пілігрымаў на далейшы шлях.
