З 13 па 15 сакавіка ў віцебскім катэдральным касцёле Езуса Міласэрнага прайшлі рэкалекцыі для супрацоўнікаў Дабрачыннага каталіцкага таварыства Caritas у Беларусі.
Віцебск стаў месцам для правядзення рэкалекцый невыпадкова, бо сёлета адзначаецца 25-годдзе з часу заснавання Віцебскай дыяцэзіі — наймалодшай у нашай краіне.
Тэмай рэкалекцый стала ахвярнае служэнне Касцёла патрабуючым, хворым, абяздоленым і пакінутым людзям.
Прыкладам такога служэння была выбрана асоба Папы Францішка, а першы дзень рэкалекцый супаў з 11-й гадавінай з часу яго абрання на пасад святога Пятра.
Духоўныя практыкаванні для супрацоўнікаў Caritas праводзіў ксёндз канонік Валерый Марціноўскі, доктар біблійнай тэалогіі, пробашч Віцебскага катэдральнага касцёла Езуса Міласэрнага.
Разам са сваімі супрацоўнікамі ў рэкалекцыях бралі ўдзел кіраўнікі структурных падраздзяленняў Дабрачыннага каталіцкага таварыства у нашай краіне: дырэктар Caritas-Беларусь ксёндз Андрэй Аніскевіч, дырэктар Caritas Мінска-Магілёўскай архідыяцэзіі брат Анатоль Ярошка OFMCap, дырэктар Caritas Віцебскай дыяцэзіі ксёндз Аляксандр Сапель SDS, дырэктар Caritas Пінскай дыяцэзіі ксёндз Чэслаў Ладыка і дырэктар Caritas-Міласэрнасць у Гомелі айцец Леанард Адушкевіч OSPPE.
У заключны дзень духоўных практыкаванняў святую Імшу для ўдзельнікаў цэлебраваў біскуп Віцебскі Алег Буткевіч, Старшыня Канферэнцыі Каталіцкіх Біскупаў у Беларусі.
У прамоўленай гаміліі іерарх перадусім адзначыў, што хоць ідзе час і мінаюць стагоддзі, але Касцёл застаецца нязменным і нязменнай застаецца яго дабрачынная дзейнасць, бо заўсёды ёсць людзі, якім патрэбна дапамога. Пры гэтым біскуп заўважыў, што дапамога ў забеспячэнні матэрыяльных патрэб дапамагае людзям адкрыцца для духоўнай рэчаіснасці.
«Любоў, якая ў гэтай дзейнасці праяўляецца, яна раскрывае сэрца чалавека на Божую ласку, Божую праўду», — падкрэсліў Старшыня беларускага каталіцкага епіскапату. Ён дадаў, што дзякуючы гэтаму дабрачыннасць становіцца сведчаннем пра Хрыста ў свеце і выкананнем місіі, даручанай Ім вучням, і гэта справа не чалавечая, а Божая.
Іерарх заўважыў, што дзейнасць Дабрачыннага каталіцкага таварыства Caritas, што ажыццяўляецца ад імя Касцёла, павінна быць прасякнута Духам Святым, які будзе накіроўваць яго супрацоўнікаў, і для гэтага ім, як і ўсім хрысціянам, неабходна малітва і практыка посту, што ўмацоўвае малітву і прыносіць духоўны плён добрых учынкаў.
На заканчэнне Імшы біскуп Алег Буткевіч удзяліў супрацоўнікам Caritas пастырскае благаслаўленне на далейшую працу і ахвярнае служэнне людзям.
