8 сакавіка ў Міждыяцэзіяльнай вышэйшай духоўнай семінарыі ў Гродне памаліліся за жанчын, а таксама павіншавалі выкладчыц і супрацоўніц гэтай касцёльнай навучальнай установы з Міжнародным жаночым днём.
Як адзначаецца на старонцы Міждыяцэзіялнай семінарыі ў сацыяльнай сетцы Instagram, цэлебрацыю святой Імшы ў семінарыйнай капліцы ў святочны дзень узначаліў Мітрапаліт Мінска-Магілёўскі арцыбіскуп Юзаф Станеўскі, які з’яўляецца выкладчыкам навучальнай установы, дзе раней быў таксама рэктарам.
На цэлебрацыю, у якой бралі ўдзел рэктар Міждыяцэзіяльнай семінарыі ксёндз канонік Віталій Вайцяхоўскі, выкладчыкі, фарматары і семінарысты, былі запрошаны ўсе жанчыны, якія тут працуюць.
Семінарыйная сям’я на чале з іерархам малілася ў інтэнцыі жанчын, якія сваёй працай у семінарыі так ці інакш удзельнічаюць у фармацыі будучых святароў.
Некаторыя з іх дзеляцца з семінарыстамі ведамі, а іншыя забяспечваюць камфортныя ўмовы жыцця ў незвычайнай навучальнай установе, дзе студэнты не толькі вучацца, але таксама жывуць і моляцца разам са сваімі фарматарамі. Пасля Імшы кожная з іх атрымала маленькі падарунак як знак увагі і ўдзячнасці ад семінарыстаў.
