У суботу 24 лютага ў Глыбокім (Віцебская дыяцэзія) адбылася сустрэча для мужчын-католікаў, якая сабрала каля двух дзясяткаў удзельнікаў з розных мясцін дыяцэзіі.
Як паведамляецца на сайце Catholicnews.by, арганізатар сустрэчы айцец Віктар Мялешка OFMConv пазнаёміў прысутных з Кодэксам і дзейнасцю міжнароднага мужчынскага руху «Ваяры Марыі».
Гэта Марыйны рух мужчын, заснаваны ксяндзом Дамінікам Хмялеўскім, салезіянінам, які дзейнічае ў Каталіцкім Касцёле.
Рух узнік як адказ Касцёла, які моліцца, на сучасныя выклікі, што стаяць перад супольнасцю вернікаў і ўсім светам. Яго мэта — фармаваць мужчын, якія, згодна з пакліканнем, атрыманым ад Бога, на прыкладзе Беззаганнай Марыі вучаццца быць вернымі сведкамі Хрыста, а праз заступніцтва святога Юзафа імкнуцца быць добрымі мужамі і бацькамі, выконваючы сваю місію ў Касцёле і ў грамадстве.
Сустрэча распачалася з разважання Балесных таямніц святога Ружанца.
Сабраныя ў Глыбокім мужчыны зноў і зноў прамаўлялі «Вітай Марыя», перабіраючы пацеркі сваіх ружанцаў.
У прамоўленай канферэнцыі айцец Віктар прапанаваў удзельнікам паразважаць над шэрагам важных пытанняў: ці гатовы мужчына змагацца за сваю сям’ю? ці гатовы змагацца з уласным грахом?..
Найбольш дзейснымі сродкамі ў гэтым змаганні, паводле святара, могуць стаць святы Ружанец, сакрамант паяднання (рэгулярная споведзь) і Эўхарыстыя.
Апоўдні распачалася святая Імша, перад якой ахвотныя мелі магчымасць прыступіць да споведзі.
Падсілкаваўшыся абедам, удзельнікі працавалі ў групах. Адарацыяй Найсвяцейшага Сакрамэнту і бласлаўленнем завяршылася першая фармацыйная сустрэча мужчын у Глыбокім, якая, паводле сведчання ўдзельнікаў, прынесла ім «мора пазітыву» і шмат цікавай інфармацыі.
