Канферэнцыя Каталіцкіх Біскупаў у Беларусі была створана ў 1999 годзе. Устаноўчы сход адбыўся 11 лютага 1999 года.
Першым Старшынёй Канферэнцыі быў абраны святой памяці кардынал Казімір Свёнтэк. Сёння ў яе склад уваходзяць восем іерархаў.
Канферэнцыя біскупаў — пастаянны орган, які аб’ядноўвае ўсіх каталіцкіх біскупаў у пэўнай краіне ці на вызначанай тэрыторыі.
Мэта канферэнцыі — каардынаванне дзейнасці біскупаў краіны ці рэгіёна і сумеснае вырашэнне праблем, актуальных для Каталіцкага Касцёла на дадзенай тэрыторыі.
Паводле Кодэкса кананічнага права, «Канферэнцыя Біскупаў, будучы пастаянным інстытутам, з’яўляецца сходам біскупаў якой-небудзь краіны або акрэсленай тэрыторыі, якія сумесна ажыццяўляюць пастырскае заданне ў адносінах да вернікаў, якія пражываюць на яе тэрыторыі, з мэтай большага садзейнічання дабру, якое Касцёл нясе людзям, асабліва праз розныя формы і спосабы апостальства, дастасаваныя да абставінаў месца і часу, згодна з нормамі права» (кан. 447).
Да Канферэнцыі Каталіцкіх Біскупаў у Беларусі адносяцца наступныя ўстановы: Пленарны сход, Пастаянная рада, генеральны сакратарыят, Біскупскія камісіі, Рады, Камітэты і Афіцыі, утвораныя паводле нормы Кодэкса кананічнага права.
Пастаянная рада складаецца са Старшыні, яго Намесніка і Генеральнага сакратара.
З 2021 года Старшынёй Канферэнцыі Каталіцкіх Біскупаў у Беларусі з’яўляецца біскуп Віцебскі Алег Буткевіч, Віцэ-старшынёй — біскуп Гродзенскі Аляксандр Кашкевіч, а Генеральным сакратаром — дапаможны біскуп Мінска-Магілёўскай архідыяцэзіі Юрый Касабуцкі.
Пры беларускім каталіцкім епіскапаце дзейнічаюць наступныя Камісіі: Камiсiя па справах фармацыi семiнарыстаў i святароў, Камісія Божага Культу і Дысцыпліны Сакрамэнтаў, Камісія па справах духавенства, Камісія па справах агульнага пастырства, Камісія па справах каталіцкай адукацыі і катэхезы, Камісія па справах абароны малалетніх, а таксама Рады па справах кантактаў з дзяржавай, па справах сям’і, па сродках масавай камунікацыі, па справах экуменізму, па справах свецкiх i моладзі, пастырства студэнтаў і працаўнікоў універсітэтаў, па справах міграцыі, турызму і пілігрымак, па справах цвярозасці, па справах аховы культурнай спадчыны і асяроддзя, па справах дабрачыннасці, справядлівасці і міру.
Канферэнцыя Каталіцкіх Біскупаў у Беларусі рэгулярна збіраецца на пасяджэнні, на якіх абмяркоўваюцца важныя пытанні жыцця Касцёла ў нашай краіне.
