2 лютага ў капліцы Хрысціянскага сацыяльнага цэнтра адзначылі адпустовую ўрачыстасць Ахвяравання Пана, якая ў народзе мае яшчэ адну традыцыйную назву — Маці Божай Грамнічнай.
Цэлебрацыю святой Імшы з гэтай нагоды ў адзінай святыні ў Мінска-Магілёўскай архідыяцэзіі, якая мае такі тытул, узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі, які за тыдзень да гэтага адзначаў 10-годдзе з часу біскупскага пасвячэння.
Гамілію прамовіў арцыбіскуп эмэрыт Тадэвуш Кандрусевіч, які напачатку сказаў, што дзесяць гадоў таму ў Касцёл на Беларусі увайшлі «тры мушкецёры» — тры новыя біскупы: Алег Буткевіч, Юрый Касабуцкі і Юзаф Станеўскі.
Заслужаны іерарх вобразна пажадаў біскупу Касабуцкаму «мушкецёрскай шпагай Божага слова бараніць нас ад зла».
Арцыбіскуп Кандрусевіч заўважыў, што падарожжа Немаўляткі Езуса ў Ерузалемскую святыню становіцца правобразам Яго апошняга падарожжа на Галготу, што «паказвае непарыўную сувязь, з аднаго боку, таямніцы Богаўцелаўлення, а з другога — Пасхальнай таямніцы смерці і Змёртвыхпаўстання, якія аб’ядноўвае ахвярная любоў Езуса».
Натхнёныя Святым Духам, старац Сімяон і прарочыца Ганна пазнаюць у Дзіцяці доўгачаканага Месію. Паводле словаў Сімяона, Езус з’яўляецца святлом для асвячэння язычнікаў і хвалой Ізраэля, які прызначаны на падзенне і паўстанне многіх і на знак, якому будуць супрацьстаяць.
«Гэтае прароцтва Сімяона мае фундаментальнае значэнне. Яно вучыць, што ў адносінах да Езуса нельга быць абыякавым: неабходна зрабіць выбар. Для тых, хто паверыць, Хрыстус будзе Збаўцам, а хто не паверыць — прычынай іх падзення. <…>
Свята Ахвяравання Езуса ў святыні заклікае нас, падобна Сімяону, праслаўляць Бога, за дар веры, якая адкрывае дарогу ў шчаслівую вечнасць. Заклікае яно таксама быць „свечкамі Хрыста“. Гэта нялёгка, асабліва ў наш час, калі вецер секулярызму і маральнага рэлятывізму хоча іх згасіць», — падкрэсліў арцыпастыр.
Ён дадаў, што ў гэтае свята Касцёл адзначае таксама Дзень кансэкраванага жыцця.
«Асобы, якія выбіраюць свой жыццёвы шлях згодна з евангельскімі парадамі цэлібату, беднасці і паслухмянасці, ахвяруюць сябе Богу», — сцвердзіў іерарх і павіншаваў прысутных прадстаўнікоў кансэкраванана жыцця, пажадаўшы ім Божага благаслаўленнчя і апекі Марыі ў жыцці паводле евангельскіх парад для сужэння Касцёлу і людзям. Сёстрам уршулянкам, якія клапоцяцца пра сацыяльны цэнтр, арцыбіскуп пажадаў «вытрываласці ў выхаванні маладога пакалення, каб паспяхова рэалізавалі ўскладзеную на іх плечы місію».
На заканчэнне гаміліі заслужаны іерарх прывёў словы аднаго святара, які жартам сказаў, што капліца ў Хрысціянскім сацыяльным цэнтры — гэта «капліца Маці Божай ад ваўкоў».
«Тут на вітражы мы бачым Марыю ў акружэнні ваўкоў. Паводле легенды, Марыя абараняла дзяўчынку ад гэтых драпежных звяроў, каля тая ішла з касцёла дамоў з запаленай грамнічнай свечкай», — адзначыў арцыбіскуп Кандрусевіч, параўнаўшы небяспечныя выклікі сучаснасці з ваўкамі, якія «нападаюць на нас, каб мы адмовіліся ад сваёй веры і замест вечных кашоўнасцяў выбіралі часовыя».
Арцыбіскуп Тадэвуш Кандрусевіч па традыцыі завяршыў гамілію кароткай малітвай: «Марыя, Маці Божая Грамнічная, абараняй нас і не дазволь, каб мы паддаліся грэшным спакусам нашага часу, але дазволь заставацца вернымі хрысціянскаму пакліканню, быць святлом для асвятлення няверуючых і хвалой нашага народа».
Прысутныя на цэлебрацыі маленькія выхаванцы Хрысціянскага сацыяльнага цэнтра таксама павіншавалі сясцёр уршулянак з іх святам і пажадалі апекі Маці Божай на кожны дзень іх прысвечанага Богу жыцця.
