21 студзеня, у трэцюю Звычайную нядзелю, у Касцёле адзначалася ўстаноўленая Папам Францішкам нядзеля Божага слова.
У гэты дзень арцыбіскуп эмэрыт Тадэвуш Кандрусевіч узначаліў цэлебрацыю святой Імшы ў капліцы Ахвяравання Пана (Маці Божай Грамнічнай) у Хрысціянскім сацыяльным цэнтры ў Мінску.
На пачатку Эўхарыстыі адбылася ўрачыстая інтранізацыя Бібліі з мэтай падкрэсліць значэнне асаблівай цэлебрацыі. У прамоўленай гаміліі арцыбіскуп Кандрусевіч напачатку заўважыў, што з усіх чатырох евангелістаў толькі Марк распачынае сваё Евангелле словамі: «Пачатак Евангелля Езуса Хрыста, Сына Божага».
«Марк адзіны выкарыстоўвае слова „Евангелле“. Гэтае слова было вядома ў тагачасных эліністычнай і рымскай культурах. Пасля перамогі над ворагамі людзям абвяшчалася евангелле — радасная і добрая навіна аб гэтай падзеі.
Хрысціянства запазычыла гэтае слова з мэтай аб’яўлення Добрай Навіны аб збаўленні»,— адзначыў заслужаны іерарх, дадаўшы, што Божае слова трэцяй Звычайнай нядзелі падкрэслівае неабходнасць навяртання і адказау на Божы заклік да адмысловай місіі.
Арцыбіскуп звярнуў увагу на тое, што ў Евангеліі апавядаецца пра пакліканне першых апосталаў, якія з простых галілейскіх рыбакоў становяцца «лаўцамі людзей».
«Рыбакі ловяць рыбу сеткамі. Сетка „лаўцоў людзей“ сатканая з заўсёды актуальнага і дзейснага Божага слова. Таму неабходна звяртаць большую ўвагу на яго вывучэнне і практычнае выкарыстанне.
Слова Божае вызваляе грэшнікаў з палону зла, каб маглі жыць у іншым свеце: не ў свеце спажывальніцтва, а ў радаснай прасторы дзялення. Не ў няволі пачуццяў, але ў ахвярнай любові, натхнёнай праўдай пра чалавека. Не ў цемры стымулятараў і наркотыкаў, якія затуманьваюць свядомасць і забіваюць дынамізм жыцця, але ў бляску асветленага Божай мудрасцю розуму, што нясе радасць і шчасце.
Біблія павінна быць нашай настольнай кнігай і практычным GPS-ам на складаных шляхах нашага жыцця, калі выклікі секулярызму і маральнага рэлятывізму становяцца вельмі небяспечнымі і вядуць духоўнае жыццё чалавека ў тупік», — падкрэсліў іерарх.
Ён нагадаў, што ў часы ваяўнічага атэізму было вельмі складана набыць Біблію, каб наталіць голад Божага слова, які тады адчувалі вернікі. Цяпер такіх праблем няма, і неабходна толькі чытаць Святое Псанне.
Арцыбіскуп Тадэвуш Кандрусевіч пажадаў вернікам глыбока вывучаць Божае слова і жыць паводле яго прынцыпаў, каб яно стала для іх «канстытуцыяй духоўнага жыцця».
