29 лістапада біскуп Антоні Дзям’янка абвясціў дэкрэт аб адраджэнні двух гістарычных дэканатаў (акруговых вікарыятаў) у дыяцэзіі — Кобрынскага і Навамышскага.
Як паведамляецца на сайце Пінскай дыяцэзіі pcd.by, навіна аб адраджэнні дэканатаў была абвешчана ў вігілію свята святога апостала Андрэя падчас душпастырскага спаткання духавенства і кансэкраваных асоб у Пінску.
У сувязі з гэтай падзеяй былі зменены межы іншых дэканатаў на тэрыторыі Брэсцкай вобласці.
Баранавіцкі дэканат адгэтуль ахоплівае парафіі ў горадзе Баранавічы, а таксама парафіі ў мясцовасцях: Гарадзішча, Сталовічы і Русіно.
Навамышскі дэканат (гістарычна называўся Сталовіцкім) ахоплівае парафіі на тэрыторыі Баранавіцкага раёна, за выключэннем парафій у мясцовасцях, якія былі ўключаны ў Баранавіцкі дэканат.
Брэсцкі дэканат ахоплівае парафіі ў горадзе Брэсце, а таксама парафіі ў мясцовасцях: Воўчын, Высокае, Дамачава, Жабінка і Чарнаўчыцы.
Кобрынскі дэканат ахоплівае парафіі на тэрыторыі Бярозаўскага, Драгічынскага, Кобрынскага і Маларыцкага раёнаў.
Ляхавіцкі дэканат ахоплівае парафіі на тэрыторыі Ганцавіцкага і Ляхавіцкага раёнаў.
Пінскі дэканат ахоплівае парафіі на тэрыторыі Іванаўскага, Лунінецкага, Пінскага і Столінскага раёнаў.
Пружанскі дэканат ахоплівае парафіі на тэрыторыі Пружанскага і Івацэвіцкага раёнаў.
Дэканамі акруговых вікарыятаў у новых межах прызначаны: дэканам Кобрынскага дэканата — ксёндз Віктар Барысевіч, пробашч парафій у Камянцы і Пелішчы; дэканам Навамышскага дэканата — ксёндз Вікенцій Сяўрук, пробашч парафій у Ішкалдзі, Юшкавічах і Паланечцы; дэканам Ляхавіцкага дэканата — ксёндз Ян Саламон, пробашч парафіі ў Ганцавічах; дэканам Пружанскага дэканата — ксёндз Павел Ярашэвіч, пробашч парафіі ў Пружанах.
