26 лістапада, ва ўрачыстасць Хрыста Валадара сусвету, вернікі парафіі святога Казіміра ў Маладзечне (Мінска-Магілёўская архідыяцэзія) наведалі мясцовы псіханеўралагічны дом-інтэрнат для састарэлых і інвалідаў.
Сайт парафіі Pio.by паведамляе, што валанцёры з парафіяльнага цэнтра Caritas разам з супольнасцю Францішканскай моладзі Таў ахвяравалі свой час, каб падзяліцца святлом і радасцю з падапечнымі інтэрната.
Сустрэча распачалася са словаў Езуса Хрыста, якія яднаюць усіх хрысціянаў — з малітвы «Ойча наш».
Далей прысутных чакала творчая праграма. Усе ахвотные маглі прадэманстраваць свае таленты ў маляванні, спеве, у ігры на фартэпіяна, у чытанні вершаў ды танцах. Астатнія натхняліся і атрымлівалі асалоду ад творчых нумароў.
Напрыканцы мерапрыемства падапечныя разам з гасцямі частаваліся з салодкага стала, дзяліліся хваляваннямі і жартавалі.
Для жыхароў інтэрната вернікі парафіі святога Казіміра ўжо паспелі стаць добрымі знаёмымі, бо такія сустрэчы адбываюцца рэгулярна і з цягам часу ператвараюцца ў добрую традыцыю.
