У межах Тыдня бацькоўскай любові, які праходзіць у Беларусі з 14 па 21 кастрычніка, касцёл Маці Божай Будслаўскай у Мінску наведалі вучні шасці старэйшых класаў школ Фрунзенскага раёна сталіцы.
Гутарку з дзецьмі правёў пробашч гэтай маладой мінскай парафіі ксёндз канонік Францішак Рудзь.
Гаворка падчас сустрэчы вялася на тэму сям’і, павагі і пашаны да бацькоў, а таксама пра важнасць вывучэння гісторыі і культуры сваёй краіны.
Падчас дыялогу святара з вучнямі асаблівая ўвага была звернута на праблемы духоўна-маральнага выхавання падлеткаў праз прызму сямейных каштоўнасцяў, павагі да традыцый сваёй краіны.
Удзел у сустрэчы ўзяла намеснік старшыні Фрунзенскай раённай арганізацыі горада Мінска Рэспубліканскага грамадскага аб’яднання «Белая Русь» Анастасія Каленчык.
Як адзначыў ксёндз Францішак, «гісторыя сям’і — гэта ключ да разумення гісторыі краіны.
Вывучэнне гісторыі і культуры свайго народа дапамагае чалавеку лепш зразумець сваю ролю ў грамадстве і адказнасць за будучыню дзяржавы», — падкрэсліў святар.
Паводле словаў ксяндза каноніка, правядзенне такіх сустрэч спрыяе ўмацаванню сувязі паміж пакаленнямі. «Добрым прыкладам такога ўзаемадзеяння па патрыятычнаму і духоўна-маральнаму выхаванню моладзі можна лічыць праект „Дыялог культур і рэлігій“, які рэалізуецца сумесна гістарычным факультэтам Беларускага дзяржаўнага універсітэта і вядучымі канфесіямі Рэспублікі Беларусь», — заўважыў ксёндз Францішак Рудзь.
