З 13 па 15 кастрычніка ў кляштары францішканаў пры касцёле Беззаганнага Зачацця Найсвяцейшай Панны Марыі ў Удзеле (Віцебская дыяцэзія, Глыбоцкі дэканат) адбылася першая сустрэча ў новым сезоне дзён духоўнага аднаўлення «Weekend (ўік-энд) з Марыяй».
Як паведамляецца на Instagram-cтаронцы праекта, першы дзень быў прысвечаны знаёмству, але ў гэты раз удзельнікі знаёміліся не толькі з людзьмі побач, але і з самімі сабой: галоўнае заданне вечара заключалася ў напісанні кампліментаў адзін аднаму.
У другі дзень удзельнікі засяродзіліся на галоўнай тэме сустрэчы «Сем радасцяў Марыі».
Айцец Павел Раманчук OFMConv правёў дзве канферэнцыі, на якіх пазнаёміў прысутных з прыгожай гісторыяй стварэння францішканскага вяночка, які складаецца з сямі радасцяў Марыі.
Удзельнікі спрабавалі паразважаць над тым, якая Яна, Маці Божая, а таксама паглядзець на радасці ў сваім жыцці.
Увечары ва ўтульным памяшканні пры святле каміна ахвотныя сабраліся, каб задаць пытанні сужэнцам, якія прыехалі, каб распавесці пра сапраўдныя хрысціянскія адносіны і падзяліцца сваім сведчаннем.
У нядзелю адбылася святая Імша, падчас якой да апостальскага таварыства «Рыцарства Беззаганнай» далучыліся яшчэ дзве асобы.
Наступны «Уік-энд з Марыяй» адбудзецца 3–5 лістапада.
