4 кастрычніка ў парафіі святых апосталаў Пятра і Паўла ў Іўі (Гродзенская дыяцэзія) адзначылі адзін з традыцыйных адпустаў у гэтай супольнасці — у гонар святога Францішка.
Да гэтай падзеі мясцовыя парафіяне падрыхтавалі адпаведныя дэкарацыі і арыгінальныя дары, якія ўпрыгожылі парафіяльную святыню.
Малітоўныя групы, духавенства, моладзь і старэйшыя вернікі разам праявілі сваю фантазію і энтузіязм.
Традыцыйна у гэты дзень вернікі дзякуюць Богу за вырашчаныя на сваіх палетках і прысядзібных гародах садавіну і гародніну, моляцца за парафію праз заступніцтва святога Францішка.
У гаміліі, якую прамовіў запрошаны новапрэзбітэр Андрэй Юхнік, ён заахвоціў вернікаў па прыкладзе святога Францішка з Асізі не баяцца цяжкасцяў жыцця, а вырашаць іх разам з Езусам.
«З Богам усе цяжкасці, усе жыццёвыя буры можна пераадолець і выйсці з іх яшчэ мацнейшым.
З Богам нашае жыццё напаўняецца сэнсам і радасцю, бо толькі ў Ім і дзякуючы Яму нашае жыццё будзе не цяжарам і ярмом, а ганаровай місіяй і сапраўдным дарам», — сказаў малады святар.
Парафіяльнае свята завяршылася эўхарыстычнай працэсіяй вакол касцёла і ўдзяленнем прыміцыйнага благаслаўлення вернікам.
