На пачатку верасня ў Міждыяцэзіяльнай вышэйшай духоўнай семінарыі ў Гродне распачаўся новы навучальны год.
Традыцыйна на яго пачатку адбыліся рэкалекцыі, якія з 3 па 6 верасня праводзіў для семінарыйнай супольнасці ксёндз Міхал Цвячкоўскі, марыянін, які нясе служэнне ў санктуарыі Маці Божай Фацімскай у Жодзіне (Мінска-Магілёўская архідыяцэзія).
Новы навучальны год у адзінай дзеючай сёння каталіцкай духоўнай семінарыі ў Беларусі сёлета распачалі тры дзясяткі кандыдатаў да святарства з Гродзенскай і Віцебскай дыяцэзій, а таксама з Мінска-Магілёўскай архідыяцэзіі.
Падчас духоўных практыкаванняў рэкалекцыяніст падзяліўся з семінарыстамі сведчаннем свайго ўласнага паклікання. Ксёндз Міхал асабліва падкрэсліў важнасць будавання адносін з Езусам праз Марыю. Святар таксама прывёў у прыклад шэраг падзей з гісторыі, у якіх праявілася дзеянне Маці Божай, адзначыўшы, што з даўніх часоў і да сёння Багародзіца не перастае аб’яўляцца людзям, заклікаючы іх да шчырай малітвы і пакаяння.
