31 ліпеня – 1 жніўня ў Навагрудку адбыліся ўрачыстасці з нагоды 80-й гадавіны з дня мучаніцкай смерці адзінаццаці благаслаўлёных законніц з Кангрэгацыі Сясцёр Найсвяцейшай Сям’і з Назарэта.
У час Другой сусветнай вайны з 31 ліпеня на 1 жніўня 1943 года ў Батароўскім лесе каля Навагрудка гітлераўцы расстралялі сясцёр назарэтанак з мясцовага кляштара, якія аддалі сваё жыццё ўзамен за 120 чалавек, мужчын і святара, арыштаваных і асуджаных на смерць.
Як паведаміла Прэс-служба Гродзенскай дыяцэзіі, узяць удзел ва ўрачыстасцях, каб ушанаваць памяць сведкаў Хрыста, якія прынеслі сябе ў ахвяру за бліжніх, і вучыцца ў іх адважна ісці праз жыццё, прыбыло шмат людзей.
Таксама прыйшла традыцыйная пешая пілігрымка з Новай Мышы (Пінская дыяцэзія, Баранавіцкі дэканат) у складзе 27-і чалавек.
Удзельнікі ўрачыстасцяў дзякавалі Пану за дар благаслаўлёных назарэтанак для Касцёла на Беларусі. Праз заступніцтва сясцёр мучаніц прысутныя прасілі даць ім, іх сем’ям і супольнасцям ласку глыбокай і моцнай веры, адвагі, сапраўднай любові да Бога і бліжніх.
Акрамя таго, маліліся за мір ва ўсім свеце, у кожным доме і сям’і, і аб беатыфікацыі сястры Малгажаты Банась — дванаццатай назарэтанкі з навагрудскага кляштара, якая выпадкова пазбегла мучаніцкай смерці.
Святую Імшу падчас урачыстасцяў узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі. У гаміліі іерарх падкрэсліў, што Батароўскі лес, нямы сведка тых трагічных падзей, «стаў для сясцёр назарэтанак своеасаблівай Галготай, на якую яны неслі свой крыж», і што «яны загінулі, але, як і Езус, перамаглі смерць, бо праз яе ўвайшлі ў Божае Валадарства».
Потым у навагрудскім фарным касцёле — дыяцэзіяльным санктуарыі благаслаўлёнай сястры Стэлы і дзесяці яе паплечніц, дзе ў саркафагу змешчаны іх рэліквіі, — адбылося малітоўнае чуванне.
У праграме чування, якое працягвалася ўсю ноч, былі, між іншым, духоўная канферэнцыя, Вяночак да благаслаўлёных сясцёр мучаніц у інтэнцыі сем’яў, адарацыя Найсвяцейшага Сакрамэнту, Крыжовы шлях.
У 4.30 — прыкладны час расстрэлу сясцёр — адбылася святая Імша.
