15 мая ў дыяцэзіяльным санктуарыі Маці Божай Каралевы нашых сем’яў у Тракелях (Радунскі дэканат) прайшла фармацыйная сустрэча для духавенства Гродзенскай дыяцэзіі да пяці гадоў святарства.
Як паведаміла Прэс-служба Гродзенскай дыяцэзіі, на сустрэчы ксёндз Павел Урбан, пробашч парафіі Маці Божай Нястомнай Дапамогі ў Парэччы (дэканат Гродна-Усход) і віцэ-афіцыял біскупскага суду ў Гродне, разважаў з маладымі святарамі, між іншым, аб супрацоўніцтве вікарыя з пробашчам.
Цэнтральнай часткай сустрэчы стала святая Імша, цэлебрацыю якой узначаліў біскуп Гродзенскі Аляксандр Кашкевіч.
У гаміліі ксёндз Павел Урбан казаў пра сведчанне святара. Ён адзначыў, што яно вельмі патрэбнае сённяшняму свету, асабліва маладым людзям, якія ў святары хочуць бачыць прыклад святасці і дасканаласці.
На заканчэнне Імшы біскуп Кашкевіч, звярнуўшыся да сваіх маладых супрацоўнікаў, падкрэсліў, што годнасць прэзбітэрату патрабуе ад духоўных асоб святасці і вернасці, бо Касцёл і ўсе людзі маюць права чакаць ад іх паводзінаў, годных святара.
Іерарх падзякаваў адказным за арганізацыю сустрэчы, асабліва ксяндзу каноніку Паўлу Салабуду, мадэратару пастаяннай фармацыі маладых святароў Гродзенскай дыяцэзіі.
