Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB узяў удзел у цырымоніі ўзнагароджання пераможцаў Першага адкрытага абласнога конкурсу дзіцячай мастацкай і дэкаратыўна-прыкладной творчасці, што адбылася ў Магілёўскім абласным мастацкім музеі імя Пятра Масленікава.
Як паведаміў 16 мая партал mogilevnews.by, конкурс «Светлая Пасха — сімвал міру» праводзіўся галоўным упраўленнем па адукацыі Магілёўскага аблвыканкама і Магілёўскім абласным аддзяленнем Беларускага фонда міру.
Урачыстасць і адкрыццё тэматычнай выставы прац пераможцаў і ўдзельнікаў конкурсу прайшло з удзелам намесніка старшыні Магілёўскага аблвыканкама Валерыя Малашкі, іерархаў Праваслаўнай Царквы і Каталіцкага Касцёла, прадстаўнікоў грамадскасці.
На конкурс паступіла больш за 600 прац, з якіх 45 атрымалі найвышэйшую адзнаку журы.
