Супольнасць Кангрэгацыі святароў Найсвяцейшага Сэрца Езуса ў Беларусі і Курыя Гродзенскай дыяцэзіі са смуткам паведамляюць, што 14 красавіка ў Тухаве (Польшча) на 88-м годзе жыцця адышоў у вечнасць ксёндз Эрнэст Будын, сэрцанін, які з 1990 па 2013 год служыў на Гродзеншчыне.
Падчас служэння ў Беларусі святар удзельнічаў ва ўтварэнні структуры мясцовай супольнасці сэрцанаў, быў пробашчам парафіі святога Станіслава, біскупа і мучаніка, у Ляцку (Шчучынскі дэканат), а пазней — парафіі Божай Міласэрнасці ў Гродне (Вішнявец).
Ксёндз Эрнэст Будын SCI нарадзіўся ў 1935 годзе ў Кендзежынцы (Польшча). Першыя манаскія абяцанні прынёс у 1952 годзе ў Стадніках, прэзбітэрскае пасвячэнне ўдзяліў яму ў 1960 годзе ў Кальварыі Зэбжыдоўскай арцыбіскуп Караль Вайтыла, пазней — Папа Ян Павел ІІ.
Быў эканомам манаскіх дамоў у Плішчыне, Кракаве і Стадніках, вікарыем у Кросна-Аджаньске, пробашчам парафіі ў Флёрынцы.
У 1990 годзе прыбыў у Беларусь, у 2013 вярнуўся ў Польшчу, дзе стаў служыць у Сасноўцы.
У Беларусі святая Імша за спачылага ксяндза Эрнэста Будына SCI будзе цэлебравацца 15 красавіка а 17-й гадзіне ў парафіі святога Станіслава, біскупа і мучаніка, у Ляцку.
Пахаванне спачылага святара адбудзецца 17 красавіка ў парафіі ў Стадніках. У 11.30 (па польскім часе) адбудзецца святая Імша, пасля — пахаванне на мясцовых могілках.
